لاہور۔20مارچ (اے پی پی):سر سبز پنجاب، پنجاب فوڈ اتھارٹی حکومت پنجاب کے شانہ بشانہ ہے۔ وزیر اعلی پنجاب مریم نواز شریف کے ویژن ‘پلانٹ فار پاکستان’ کے تحت پنجاب فوڈاتھارٹی کارخیر میں شامل ہوگیا ہے۔ پنجاب فوڈ اتھارٹی ہیڈ کوارٹر میں ایڈیشنل ڈی جی ایڈمن، ایڈیشنل ڈی جی ریسورس اینڈ لائسنسنگ، ڈائریکٹر پلاننگ اینڈ کوارڈینیشن، ڈپٹی ڈائریکٹر ایڈمن نے پودا لگاکر کیمپین کا آغاز کردیا۔
جاری تفصیلات میں بتایا گیا کہ صوبہ بھر کے تمام دفاتر میں پودے لگائیں جائیں گے، پنجاب فوڈ اتھارٹی کے تمام ملازمین دفتر، گھر اور اپنے گردونواح میں پودا لگا کر عوام کو بھی شجر کاری مہم کی ترغیب دیں گے، فیلڈ ٹیمیں فوڈ پوائنٹس اور ریسٹورنٹس کو بھی شجرکاری مہم میں شریک ہونے کی ترغیب دیں گی،پنجاب فوڈ اتھارٹی کی جانب سے سرکاری و نجی سکولز میں جاری سکول نیوٹریشن پروگرام میں بچوں کو بھی کم از کم ایک پودا لگانے کی ترغیب دی جائے گی۔
ترجمان فوڈ اتھارٹی کے مطابق درخت ہماری زمین کے اردگرد پھیلے ہوا کے غلاف کی صفائی کا واحد ذریعہ ہیں، ہماری زندگی آکسیجن سے وابستہ ہے، آکسیجن کے حصول کے لیے درخت انتہائی ضروری ہیں، شجرکاری کے لئے ہم انفرادی سطح پر پنجاب حکومت کا ہاتھ بٹائیں گے، درخت نہ صرف ہماری زمین کا حسن ہیں بلکہ یہ کرہ ارض پر زندگی کی علامت بھی ہیں، پلانٹ فار پاکستان مہم میں ہر شہری کو پودا لگا کر اپنے قومی فریضہ ادا کرنا چاہیے، ملک سرسبز و شاداب ہوگا تو پاکستان کا ماحول بہتر ہوگا۔
Short Link: https://urdu.app.com.pk/urdu/?p=574875
