اسلام آباد۔11اگست (اے پی پی):سسٹین ایبل سوشل ڈویلپمنٹ آرگنائزیشن (ایس ایس ڈی او ) اور دی کلائمیٹ آپٹکس کے زیر اہتمام آزادی کلیننگ ڈرائیو کا انعقاد ٹریل 5 اسلام آباد میں کیا گیا۔ اس مہم کا مقصد یوم آزادی کے موقع پر ماحول دوست رویوں کو فروغ دینا اور پاکستان کو کچرے سے پاک بنانے کے لیے عوام میں شعور اجاگر کرنا تھا۔مہم میں شہریوں، ماحولیاتی کارکنوں اور سول سوسائٹی کے ارکان نے شرکت کی۔ رضاکاروں نے ٹریل کے مختلف حصوں سے کوڑا کرکٹ اکٹھا کیا اور عوام کو ماحول کی حفاظت اور صفائی کے بارے میں آگاہی فراہم کی۔ایس ایس ڈی او کے ایگزیکٹو ڈائریکٹر سید کوثر عباس نے اس موقع پر کہا کہ آزادی تب مکمل ہوتی ہے جب ہم اپنے ملک کے ماحول کی حفاظت کو اپنی ذمہ داری نہ سمجھیں۔
انہوں نے کہا کہ ہمارا فرض ہے کہ ہم اپنی زمین، پانی اور ہوا کو محفوظ رکھیں۔ آزادی کلیننگ ڈرائیو جیسی سرگرمیوں کے ذریعے ہم عوام کو یہ پیغام دینا چاہتے ہیں کہ چھوٹے مگر مستقل اقدامات سے ہم ایک صاف اور سرسبز پاکستان تشکیل دے سکتے ہیں۔انہوں نے مزید کہا کہ ایس ایس ڈی او اور دی کلائمیٹ آپٹکس ماحولیاتی تحفظ، کچرے کے انتظام اور موسمیاتی تبدیلی کے بارے میں آگاہی پیدا کرنے کے لیے آئندہ بھی اس طرح کی ڈرائیوز جاری رکھیں گے۔شرکا نے اس عزم کا اظہار کیا کہ وہ نہ صرف خود کچرا پھیلانے سے گریز کریں گے بلکہ اپنے اردگرد کے لوگوں کو بھی ماحول دوست رویے اپنانے کی ترغیب دیں گے۔ مہم کے اختتام پر رضاکاروں نے پاکستان کو کچرے سے پاک رکھنے کا حلف اٹھایا۔
