اسلام آباد۔15دسمبر (اے پی پی):وفاقی وزیر داخلہ شیخ رشید احمد نے کہا ہے کہ سعودی عرب میں کفالت سے متعلق نئے لیبر قوانین سے پاکستانی محنت کشوں کو فائدہ ہوگا، نئے قوانین سے سعودی عرب میں روزگار کے نئے مواقع پیدا ہوں گے۔ ان خیالات کا اظہار انہوں نے پاکستان میں سعودی عرب کے سفیر نواف سعید المالکی سے گفتگو کرتے ہوئے کیا جنہوں نے منگل کو یہاں ان سے ملاقات کی۔ ملاقات میں پاکستان، سعودی عرب تعلقات، سعودیہ میں پاکستانی قیدیوں کی جلد رہائی پر تبادلہ خیال کیاگیا ۔ ملاقات میں شیخ رشید احمد نے کہا کہ سعودی عرب میں کفالت سے متعلق نئے لیبر قوانین سے پاکستانی محنت کشوں کو فائدہ ہوگا۔ نئے قوانین سے سعودی عرب میں روزگار کے نئے مواقع پیدا ہوں گے۔ انہوں نے کہا کہ قیدیوں سے تبادلے سے متعلق معاہدے کو جلد حتمی شکل دینے کے لئے کوششیں تیز کرنے کی ضرورت ہے۔ انسداد منشیات کے حوالے سے پاکستان اور سعودی عرب کے درمیان معاہدے کو بھی جلد مکمل کیا جائے۔ وزیر داخلہ نے کہا کہ پاکستان اور سعودی عرب کے درمیان تعلقات باہمی بھائی چارے اور محبت پر مبنی ہیں۔سعودی سفیر نے شیخ رشید احمد کو وزارت داخلہ کا چارج سنبھالنے پر مبارکباد دی ۔ شیخ رشید احمد نےا خادمین حرمین شریفین کے لئے نیک تمناؤں کا اظہار کیا۔ ملاقات میں سیکرٹری داخلہ یوسف نسیم کھوکھر بھی موجود تھے
