لاہور۔26اپریل (اے پی پی):وزیر اعظم کے معاون خصوصی ہارون اختر خان نے کہا ہے کہ سوزوکی کمپنی کاگاڑیوں کیلئے بائیو گیس پلانٹ کا قیام قابل ستائش اقدام ہے، وزیر اعظم کا ”اڑان ویژن”صاف اور پائیدار توانائی کے ذرائع کے فروغ پر مرکوز ہے، پاکستان میں سرمایہ کار ی کیلئے ماحول ساز گار ہے ،حکومت بیرونی سرمایہ کاروں کو تمام ممکنہ سہولیات فراہم کر ے گی،موجودہ حکومت کاربن کے اخراج میں کمی اور صاف توانائی کے فروغ کی ہر ممکن حمایت جاری رکھے گی ۔ان خیالات کا اظہار انہوں نے ہفتہ کے روز یہاں مانگا منڈی میں سوزوکی کمپنی لمیٹڈ کے مجوزہ بائیو گیس پلانٹ مقام کے دورہ کے موقع پر میڈیا سے گفتگو کرتے ہوئے کیا ۔
معاون خصوصی نے کہاکہ سوزوکی کمپنی کی جانب سے گاڑیوں کیلئے بائیو گیس پلانٹ کا قیام قابل ستائش اقدام ہے ،بایو گیس پلانٹ سے مقامی کسانوں کو معاشی فائدہ اوریہ منصوبہ پاکستان کے صاف توانائی کے مستقبل کی جانب اہم سنگ میل ثابت ہو گا ۔انہوں نے کہا کہ پاکستان کی ترقی و خوشحالی میں بائیو گیس ایک امید کی کرن ہے جس کا ملکی انڈسٹری کو فروغ دینے میں اہم کردار ہو گا، یہ مہنگی تیل اور ایل این جی کی درآمدات پر انحصار کم کرنے کی صلاحیت رکھتی ہے۔
ہارون اختر خان نے اس بات کا اعادہ کیا کہ وزیر اعظم محمد شہباز شریف کا ”اڑان ویژن”صاف اور پائیدار توانائی کے ذرائع کے فروغ پر مرکوز ہے، اڑان پروگرام پاکستان کو ترقی یافتہ ممالک کی صف میں کھڑا کرنے کیلئے بہترین منصوبہ اوربائیو گیس پلانٹ ماحول دوست و معاشی طور پر فائدہ مند منصوبہ ہے۔ انہوں نے کہا کہ موجودہ حکومت کی مثبت پالیسیوں کی بدولت مہنگائی میں نمایاں کمی اور معیشت میں استحکام آ یا ہے ،دنیا پاکستان کی معاشی پالیسیوں کی معترف ہے ، ملکی معیشت کے حوالے سے غیر ملکی کمپنیوں کے اعشاریے مثبت ہیں۔
معاون خصوصی نے کہا کہ بائیو گیس جیسے منصوبے مقامی کسانوں کو معاشی فائدہ پہنچانے کے ساتھ ساتھ ماحول کے تحفظ میں بھی اہم کردار ادا کر سکتے ہیں،انہوں نے متعلقہ حکام کو ہدایت کی کہ بائیو گیس پلانٹ کے منصوبے پر فوری عملدرآمد کو یقینی بنایا جائے۔ اس موقع پر سوزوکی کے نمائندوں نے معاون خصوصی کو بریفنگ دیتے ہوئے آگاہ کیا کہ ضرورت پڑنے پر بائیو گیس پر چلنے والی گاڑیوں کو پٹرول پر بھی چلایا جا سکتا ہیں۔ ہارون اختر خان نے یقین دہانی کرائی کہ موجودہ حکومت کاربن کے اخراج میں کمی اور صاف توانائی کے فروغ کی ہر ممکن حمایت جاری رکھے گی۔
دریں اثناء سوزوکی کمپنی لمیٹڈ پاکستان کے مینجنگ ڈائریکٹرہیروشی کاوامورا نے معاون خصوصی کے پہنچنے پرشاندار استقبال کیا، معاون خصوصی نے گاڑیوں کے لیے بائیو گیس پلانٹ کے قیام کے سوزوکی اقدام کو سراہا۔
Short Link: https://urdu.app.com.pk/urdu/?p=588216
