سٹیٹ لائف انشورنس کارپوریشن سرگودھا کے زیرِاہتمام جشنِ آزادی اور نمایاں کارکردگی کا مظاہرہ کرنے والے افسران کے اعزازمیں تقریب کا انعقاد

سرگودھا ۔ 17 اگست (اے پی پی):سٹیٹ لائف انشورنس کارپوریشن آف پاکستان سرگودھا زون کے زیرِ اہتمام جشنِ آزادی اور نمایاں کارکردگی کا مظاہرہ کرنے والے افسران کے اعزاز میں ایک پُروقار تقریب کا انعقاد کیا گیا۔ تقریب میں ریجنل چیف سعید احمد ملک اور زونل ہیڈ سرگودھا محمد سرور سمیت سیکٹر ہیڈز، ایریاء مینجرز ، سیلز مینجرز و افسران اور دیگر معززین نے شرکت کی۔ تقریب کے دوران اگست کے اہداف مقرر کیےگئےاور شرکاء نے قومی جذبے اور بھرپور جوش و خروش کے ساتھ یومِ آزادی منایا۔ اس موقع پر پاکستان کے یومِ آزادی کے ساتھ ساتھ جناب سعید احمد ملک کی سالگرہ بھی منائی گئی۔ پاکستان اورسعید احمد ملک کی سالگرہ کے کیک کاٹے گئے اور ایک دوسرے کو مبارکباد پیش کی گئی۔تقریب کی ایک اہم خصوصیت نمایاں کارکردگی کا مظاہرہ کرنے والے افسران اور ساتھیوں کی حوصلہ افزائی تھی۔

بہترین کام کرنے والے افراد کو سٹیج پر بلا کر سراہا گیا اور اُنکی خدمات کو خراجِ تحسین پیش کیا گیا ،جس سے شرکاء میں مزید محنت اور بہتر کارکردگی کا جذبہ پیدا ہوا۔ اس موقع پر سیکٹر ہیڈز واجد حسین شاہ، رضوان احمد چیمہ، انتظار حسین، بابر سلیم ، ساجد محمود، نواز رضا، عابد حسین ملک اور ریاض حسین شاہ بھی موجود تھے۔ تقریب کے اختتام پر پاکستان کی سلامتی، خوشحالی اور ترقی کے لیے خصوصی دُعائیں کی گئیں۔ شرکاء نے اس عزم کا اظہار کیا کہ سٹیٹ لائف انشورنس کارپوریشن آف پاکستان کی ترقی اور کامیابی کے لیے بھرپور محنت جاری رکھی جائے گی۔