اسلام آباد۔15جنوری (اے پی پی):سپریم کورٹ نے لیول پلیئنگ فیلڈ کے حوالہ سے الیکشن کمیشن کے خلاف پاکستان تحریک انصاف کی درخواست واپس لینے کی بنیاد پر نمٹا دی ہے۔
چیف جسٹس آف پاکستان جسٹس قاضی فائز عیسیٰ کی سربراہی میں پیر کو یہاں سپریم کورٹ کے تین رکنی بنچ نے الیکشن کمیشن کے خلاف پی ٹی آئی کی توہین عدالت کی درخواست پر سماعت کی۔سماعت کے موقع پر پی ٹی آئی کے وکیل لطیف کھوسہ نے عدالت کے روبرو موقف اپنایا کہ ہم الیکشن کمیشن کے خلاف توہین عدالت کی دائر درخواست واپس لے رہے ہیں۔
عوام کی عدالت میں جانا پسند کریں گے۔ انہوں نے عدالت کو آگاہ کیا کہ مجھے ہدایات ملی ہیں کہ درخواست واپس لے لی جائے۔ بعد ازاں سپریم کورٹ نے الیکشن کمیشن کے خلاف پی ٹی آئی کی توہین عدالت کی درخواست واپس لینے کی بنیاد پر نمٹا دی۔
