اسلام آباد ۔ 22 مارچ (اے پی پی) سپیکر قومی اسمبلی اسد قیصر نے کہا ہے کہ نوجوانوں کی صلاحیتوں کو بروئے کار لا کر ملک کو درپیش سماجی و اقتصادی مسائل پر قابو پایا جا ستکتا ہے، نوجوان ملک میں حقیقی تبدیلی لا سکتے ہیں اور ان کی سیاسی نشوونما اور پختگی کے ذریعے پاکستان کے روشن مستقبل کو یقینی بنایا جا سکتا ہے، نوجوانوں کی سیاسی پختگی کےلئے سیمینارز کا انعقاد، گروپ سٹڈیز، تحقیق اور ان کی سیاسی سرگرمیوں میں شرکت ضروری ہے۔ ان خیالات کا اظہار انہوں نے جمعہ کو نوجوان سیاستدانوں کے فیلوشپ پروگرام کی افتتاحی تقریب سے خطاب کرتے ہوئے کیا۔ سپیکر قومی اسمبلی نے کہا کہ ذاتی مفادات اور سیاسی وابستگیوں سے بالاترہو کر منزل کا تعین ایک خوشحال اور ترقی پسند پاکستان کےلئے ناگزیر ہے۔ انہوں نے کہا کہ ذاتی مفادات سے بالاتر ہو کر کام کریں تو اللہ تعالی آپ کو عزت سے نوازتے ہیں، انسان عہدے نہیں بلکہ اپنے کام سے بڑا آدمی بنتا ہے۔ انہوں نے کہا کہ ہم سب پاکستانی ہیں اور اس کی تعمیر و ترقی کےلئے ہم سب کو مل کر کام کرنا ہو گا۔ انہوں نے نوجوانوں پر مقررہ اہداف کے حصول کےلئے عزم، سنجیدگی اور جہد مسلسل کی ضرورت پر زور دیتے ہو ئے کہا کہ یہ وقت یہ سوچنے کا نہیں ہے کہ پاکستان نے ہمیں کیا دیا ہے بلکہ یہ سوچنے کا ہے کہ ہم نے پاکستان کوکیا دیا۔ انہوں نے نوجوانوں کی صلاحیتوں پر اعتماد کا اظہار کرتے ہوئے کہا کہ آپ مضبوط معاشی پسِ منظر کے بغیر بھی ملک کی تعمیر و ترقی میں ایک فعال کردار ادا کر سکتے ہیں۔ انہوں نے تمام سیاسی جماعتوں کو اپنی سیاسی سرگرمیوں میں نوجوان سیاسی کارکنوں کو شامل کرنے کی ضرورت پر زور دیا۔ انہوں نے نوجوانوں کوسیاسی سرگرمیوں میں بھرپورحصہ لینے اور خلوصِ دل سے ملک کی خدمت کرنے کےلئے کہا۔ انہوں نے کہا کہ نوجوانوں کی سیاست میں حوصلہ افزائی ملک میں ایک باشعوراور مخلص قیادت کو آگے لانے کےلئے ضروری ہے۔ انہوں نے نوجوان سیاستدانوں کےلئے فیلوشپ پروگرام کے شرکاءکو مخاطب کرتے ہوئے کہا کہ اپنے ذاتی مفادات سے بالاتر ہوکر ملک و قوم کی خدمت کریں اور محنت کی قوت پر یقیں رکھیں۔ انہوں نے اس خواہش کا اظہار کیا کہ نوجوانوں کی بہتر سیاسی تربیت و نشوونما کےلئے اس نوعیت کے فیلوشپ پروگرام مستقل بنیادوں پر ہونے چاہئیں۔ انہوں نے پلڈاٹ کی طرف سے ملک میں جمہوریت کے فروغ اور نوجوان سیاستدانوں کےلئے فیلوشپ پروگرام کے انعقاد کی کاوشوں کو سراہا اور اس امید کا اظہار کیا کہ ان فیلوشپ پروگرامز سے نوجوان سیاستدانوں کو بہت کچھ سیکھنے کا موقع ملے گا جو ان کی عملی سیاسی زندگی میں ان کےلئے کارآمد ثابت ہو گا۔ صدر پلڈاٹ احمد بلال محبوب نے اس موقع پر خطاب کرتے ہوئے نوجوان سیاستدانوں کے فیلوشپ پروگرام کی افتتاحی تقریب میں شرکت کرنے پر سپیکرکا شکریہ ادا کیا۔ انہوں نے بتایا کہ نوجوان سیاستدانوں کی تربیت کےلئے اس نوعیت کا یہ پہلا پروگرام ہے جس میں ملک بھر کی11 سیاسی جماعتوں کے 27 کارکن شرکت کر رہے ہیں۔ انہوں نے پاکستان میں جمہوریت کی مضبوطی کےلئے سپیکر کی کاوشوں کو سراہتے ہوئے انہیں شیلڈ بھی پیش کی۔
