اسلام آباد ۔ 13 مئی (اے پی پی) سپیکر قومی اسمبلی اسد قیصر نے کہا ہے کہ قومی اسمبلی کا موجودہ اجلاس 24 مئی تک جاری رکھنے کا فیصلہ کیا گیا ہے’ ایوان کے ماحول کو پرامن اور خوشگوار رکھنا حکومت اور اپوزیشن کی مشترکہ ذمہ داری ہے۔ پیر کو سپیکر قومی اسمبلی اسد قیصر کی زیر صدارت حکومتی اور اپوزیشن رہنمائوں کا پارلیمنٹ ہائوس میں اجلاس ہوا۔ اجلاس میں وزیر دفاع پرویز خٹک’ وزیر خارجہ شاہ محمود قریشی’ وزر مذہبی امور نور الحق قادری’ ڈپٹی سپیکر قاسم سوری’ ارکان قومی اسمبلی سید خورشید شاہ’ راجہ پرویز اشرف’ سید نوید قمر’ خواجہ محمد آصف’ رانا تنویر حسین’ احسن اقبال اور محسن داوڑ سمیت دیگر ارکان نے شرکت کی۔ اجلاس میں فیصلہ کیا گیا کہ قومی اسمبلی کے موجودہ اجلاس کو 24 مئی تک جاری رکھا جائے گا۔ سپیکر اسد قیصر نے کہا کہ ایوان کے ماحول کو پرامن اور خوشگوار رکھنا حکومت اور اپوزیشن کی مشترکہ ذمہ داری ہے۔ موثر قانون سازی کے ذریعے عوامی مسائل کو حل اور ایوان کے وقار کو بلند کیا جاسکتا ہے، ملکی مسائل کے حل کے لئے ایوان میں نمائندگی رکھنے والی جماعتوں میں اتفاق رائے ضروری ہے۔ سپیکر نے کہا کہ اس وقت ملک کو جن مسائل کا سامنا ہے ان پر قابو پانے کے لئے تمام سیاسی قوتوں کو کردار ادا کرنا ہوگا۔ پارلیمنٹ کی مضبوطی جمہوریت کی مضبوطی و استحکام کے لئے ناگزیر ہے۔ انہوں نے کہا کہ ایوان کے ماحول کو خوشگوار رکھنے کیلئے ہمیں ایک دوسرے کی رائے کا احترام کرنا ہوگا۔ سپیکر اسد قیصر نے اجلاس کے شرکاء کی قانون سازی کے عمل اور ایوان کی کارروائی کو سازگار رکھنے میں ہر ممکن تعاون کی یقین دہانی کرائی۔
