اسلام آباد۔3ستمبر (اے پی پی):سپیکر قومی اسمبلی سردار ایاز صادق نے ایف سی ہیڈ کوارٹر بنوں پر حملے کی شدید مذمت کرتے ہوئے دھماکے کے نتیجے میں سکیورٹی فورسز کے بہادر جوانوں کے جانی نقصان پر گہرے دکھ اور افسوس کا اظہار کیا ۔ بدھ کو اپنے ایک مذمتی بیان میں انہوں نے شہید ہونے والے جوانوں کو خراج عقیدت پیش کیا اور شہداء کے اہلخانہ سے دلی ہمدردی اور تعزیت کا اظہار کیا ۔
انہوں نے کہا کہ شہداء کے اہلخانہ کے غم میں برابر کا شریک ہوں۔ دہشتگردی کی بزدلانہ کارروائیاں قوم کے حوصلے پست نہیں کر سکتیں، شہداء کی قربانیاں رائیگاں نہیں جائیں گی، قوم اپنے بہادر سپوتوں پر فخر کرتی ہے۔بھارتی اسپانسرڈ فتنہ الخوارج کے دہشت گرد خطے کے امن کے لیے خطرہ ہے۔دہشتگردوں کے خلاف سکیورٹی فورسز کی کارروائیاں قابل تحسین ہیں۔پارلیمنٹ اور قوم شہداء کے خاندانوں کے غم میں برابر کی شریک ہیں۔ سپیکر سردار ایاز صادق نے شہداء کے درجات کی بلندی اور سوگوار خاندانوں کیلئے صبر جمیل کی دعا بھی کی ۔
