اسلام آباد ۔ 08 نومبر (اے پی پی) سپیکر قومی اسمبلی سردار ایاز صادق نے کہا ہے کہ حکیم الامت علامہ محمد اقبال کا پیغام عالم گیر ہے اور ان کی شاعری معاشر ے کے تمام طبقات کی عکاسی کرتی ہے، اقبال کی تعلیمات میں امت کو درپیش مسائل کا حل موجود ہے۔ ان خیالات کا اظہار انہوں نے علامہ اقبال کے 139ویں یو م پیدائش کے موقع پر اپنے پیغام میں کیا جو ہر سال 9 نومبر کو ملک بھر میں عقیدت و احتر ام سے منایا جاتا ہے۔ سپیکر نے کہا کہ علامہ اقبال کے فلسفہ اور شاعری نے علیحدہ وطن کے حصول کےلئے بر صغیر کے مسلمانوں کی رائے کو ہموار کرنے میں اہم کردار ادا کیا اور جدوجہد آزادی کو ایک بھرپور تحریک میں بدل دیا جس کے نیتجہ میں 23 مارچ 1940ءکو قرارداد پاکستان منظور ہوئی جسے بر صغیر پاک و ہند میں بسنے والے مسلمانوں کی بھر پور تائید حاصل تھی۔ سپیکر نے کہا کہ علامہ اقبال کا خواب مسلمانان برصغیر کےلئے ایک نعمت سے کم نہیں تھا، ان کی شاعری نے مسلمانوں کے اندر ایک علیحدہ وطن کے حصول ، جہاں وہ اپنے مذہب، ثقافت اور روایات کے مطابق زندگی بسر کر سکیں، کیلئے نیا جذبہ اور ولولہ پیدا کیا۔
