راولپنڈی۔29مارچ (اے پی پی):سکیورٹی فورسز نے بلوچستان کے علاقے قلات میں آپریشن کے دوران 6دہشت گردوں کو جہنم واصل کر دیا ۔ آئی ایس پی آر کے مطابق29 مارچ 2025 کو سیکیورٹی فورسز نے بلوچستان کے ضلع قلات میں خفیہ اطلاعات کی بنیاد پر ایک آپریشن کیا، جہاں دہشت گردوں کی موجودگی کی اطلاع ملی تھی۔آپریشن کے دوران، سیکیورٹی فورسز نے مؤثر کارروائی کرتے ہوئے دہشت گردوں کے ٹھکانے کو نشانہ بنایا اور شدید فائرنگ کے تبادلے کے بعد چھ دہشت گردوں کو ہلاک کر دیا گیا۔
مارے جانے والے دہشت گرد حالیہ دہشت گردانہ سرگرمیوں میں ملوث تھے، جن میں قانون نافذ کرنے والے اداروں اور معصوم شہریوں کو نشانہ بنایا گیا تھا۔علاقے میں کلیئرنس آپریشن جاری ہے تاکہ کسی بھی باقی ماندہ دہشت گرد کو ختم کیا جا سکے۔ پاکستان کی سیکیورٹی فورسز قوم کے شانہ بشانہ بلوچستان میں امن، استحکام اور ترقی کے خلاف تمام مذموم سازشوں کو ناکام بنانے کے لیے پُرعزم ہیں۔
Short Link: https://urdu.app.com.pk/urdu/?p=577329
