راولپنڈی۔8اگست (اے پی پی):سیکورٹی فورسز نے بلوچستان کے ضلع ژوب میں 33 بھارتی حمایت یافتہ خوارج کو جہنم واصل کر دیا۔ جمعہ کو آئی ایس پی آر سے جاری بیان کےمطابق سیکورٹی فورسز نے بلوچستان کے ضلع ژوب کے علاقے سمبازہ میں 7 اور 8 اگست کی درمیانی شب ہندوستانی پراکسی فتنہ الخوارج سے تعلق رکھنے والے خوارج کے ایک بڑے گروہ کی نقل و حرکت کا پتہ چلایا جو پاک۔افغان سرحد کے راستے دراندازی کی کوشش کر رہے تھے،
پاک فوج کے جوانوں نے جرأت مندانہ اورمؤثر طریقے سے ان کی دراندازی کی کوشش کو ناکام بنایااور 33 بھارتی حمایت یافتہ خوارج کو جہنم واصل کر دیا ، ہلاک دہشت گردوں سے اسلحہ، گولہ بارود اور دھماکہ خیز مواد کا بڑا ذخیرہ بھی برآمد کیا ۔ علاقے میں پائے جانے والے دیگر خوارج کو ختم کرنے کے لئے سینی ٹائزیشن آپریشن جاری ہے۔ پاکستانی سیکورٹی فورسز ملک کی سرحدوں کے دفاع اور ملک سے بھارتی حمایت یافتہ دہشت گردی کی لعنت کو ختم کرنے کیلئے پرعزم ہیں۔
