سی پیک کے ذریعے پاکستان اور چین کے درمیان تجارت کے بہائو اور ثقافتی تبادلے کو فروغ ملے گا۔پاک چائنا چیمبر

لاہور۔5جنوری (اے پی پی):پاکستان چائنا جوائنٹ چیمبر آف کامرس اینڈ انڈسٹری نے چائنا پاکستان اکنامک کوریڈور کے تحت گلگت بلتستان کی بڑھتی ہوئی تزویراتی اور اقتصادی اہمیت کو اجاگر کرتے ہوئے کہا ہے کہ یہ کوریڈور پاکستان کے شمالی علاقوں میں شمولیتی ترقی،علاقائی روابط اور شمالی ریاستوں کی ترقی کے لیے ایک محرک بن گیا ہے۔

پی سی جے سی سی آئی کے صدر حسین سیکرٹریٹ میں منعقدہ تھنک ٹینک سیشن کے دوران کہا کہ سی پیک نے گلگت بلتستان کو پاکستان کا شمالی گیٹ وے قرار دیا ہے،جس سے تجارت، سرمایہ کاری، سیاحت اور عوام سے رابطوں کی نئی راہیں کھل رہی ہیں۔انہوں نے کہا کہ سی پیک کے تحت بہتر انفراسٹرکچر، روڈ نیٹ ورکس اور لاجسٹکس روزگار کے مواقع پیدا ہو رہے ہیں،علاقائی تفاوت کو کم کر رہے ہیں اور گلگت بلتستان کو وسطی ایشیا اور مغربی چین سمیت قومی اور علاقائی منڈیوں کے ساتھ زیادہ قریب سے مربوط کر رہے ہیں۔

بریگیڈیئر منصور سعید شیخ ریٹائرڈ،سینئر نائب صدر نے کہا کہ گلگت بلتستان سی پیک کے فریم ورک کے اندر بہت زیادہ تزویراتی اور اقتصادی اہمیت رکھتا ہے۔ پاک چائنا جوائنٹ چیمبر پختہ یقین رکھتا ہے کہ سی پیک کی حقیقی کامیابی اس بات کو یقینی بنانے میں مضمر ہے کہ اس کے فوائد مقامی کمیونٹیز،دور دراز وادیوں اور چھوٹے کاروباروں تک پہنچیں،جس سے جامع اور پائیدار ترقی کو ممکن بنایا جا سکے۔انہوں نے اس بات پر زور دیا کہ سی پیک کے ذریعے بہتر رابطے سے پاکستان اور چین کے درمیان سرحد پار تجارت،سیاحت کے بہائو اور ثقافتی تبادلے کو نمایاں طور پر فروغ ملے گا۔