کراچی۔ 25 نومبر (اے پی پی):راشد منہاس روڈ پر قائم شاپنگ سینٹر میں لگی آگ پر قابو پالیا گیا ہے ،لیکن ریسکیو آپریشن تاحال جاری ہے، آگ لگنے کے نتیجے میں6افراد کی ہلاکتوں کی تصدیق ہوئی ہے۔ہفتہ کو جاری کردہ اعلامیہ کے مطابق ڈپٹی ڈائریکٹر شعبہ حادثات جناح اسپتال کے مطابق جاں بحق اورزخمی ہونے والے تمام افراد کی عمریں 22سے 43سال تک ہیں۔ انہوں نے کہا کہ میتوں کو جناح اسپتال، سول اور عباسی شہید اسپتال منتقل کردیا گیا ہے۔ فائر بریگیڈ حکام نے بتایا کہ عمارت میں صبح 6 بجے لگنے والی آگ سے درجنوں دکانیں جل گئیں۔
آگ کی وجہ سے کثیر المنزلہ مال اور اطراف کی عمارتوں کی بجلی معطل کردی گئی۔ریسکیو حکام نے کہا کہ عمارت سے 42افراد کو ریسکیو کیا گیا تاہم دم گھٹنے کے نتیجے میں 6افراد جاں بحق گئے جبکہ 8افراد کو بے ہوشی کی حالت میں اسپتال منتقل کیا گیا ہے۔ فائر بریگیڈ حکام نے کہا کہ12گاڑیاں، 2 اسنارکل اور تقریبا 50 فائر فائٹر آگ بجھانے میں مصروف رہے جبکہ اب آگ پر قابو پالیا گیا ہے لیکن ریسکیو آپریشن تاحال جاری ہے۔ حکام نے کہا کہ عمارت میں دھواں بھرنے کے باعث آگ بجھانے میں دشواری کا سامنا کرنا پڑا، فائر بریگیڈ کے علاوہ ریسکیوکے دیگرادارے بھی امدادی کاموں میں مصروف رہے تاہم عمارت میں آگ لگنے کی وجہ تاحال معلوم نہ ہوسکی۔
