اسلام آباد۔11جون (اے پی پی):وفاقی وزیر برائے ماحولیاتی تبدیلی سینیٹر شیری رحمان نے کہا کہ خیبر پختونخوااور پنجاب میں طوفانی بارشوں کی وجہ سے مختلف حادثات میں 29 افراد کے جاں بحق اور زخمی ہونے پر دلی افسوس ہوا، جاں بحق ہونے والے افراد کے سوگوار لواحقین کے دکھ میں برابر کے شریک ہیں، ان حادثات میں زخمی ہونے والے افراد کی جلد صحتیابی کیلئے دعاگو ہوں۔
اتوار کو اپنے ٹویٹ میں وفاقی وزیر نے کہا کہ پاک افواج، پی ڈی ایم اے اور دیگر متعلقہ مقامی اداروں کی جانب سے بروقت امدادی کاروائیاں قابل تحسین ہیں۔ انہوں نے کہا کہ سندھ کے بعد پنجاب اور خیبر پختونخوا میں مون سون سے پہلے ہی طوفانی ہوائوں، شدید بارشوں اور ان سے ہونے والی تباہی قابل تشویش ہے۔
آندھی، طوفانی بارشوں اور ژالہ باری سے انسانوں، مویشیوں، کھڑی فصلوں، کمزور عمارتوں اور کچے گھروں کو شدید نقصان ہو اہے۔ وفاقی وزیر نے کہا کہ ہم نے تمام صوبائی حکومتوں اور متعلقہ اداروں کو مزید ماحولیاتی واقعات کیلئے چوکنا اور تیار رہنے کی ہدایت کی ہے۔
ہم نے سندھ اور بلوچستان کی صوبائی حکومتوں کو سمندری طوفان بِپرجوائے کے حوالے سے بھی پیشگی ہنگامی اقدامات کی ہدایت کی ہے۔ انہوں نے کہا کہ پاکستان ماحولیاتی تبدیلی کا سبب نہیں، باوجود اس کے ہم ماحولیاتی تبدیلی کا "گرائونڈ زیرو” بن چکے ہیں۔
