صحت کے شعبے میں انتظامی استعداد ،شفافیت وجوابدی سے متعلق 2روزہ بلوچستان ہیلتھ لیڈر شپ کانفرنس کا انعقاد

کوئٹہ۔ 03 جولائی (اے پی پی):بلوچستان میں صحت کے شعبے میں انتظامی استعداد، شفافیت، جوابدہی اور عوامی خدمات کے معیار کو مزید موثر بنانے کے مقصد سے تیسری بلوچستان ہیلتھ لیڈرشپ کانفرنس جمعہ کوکوئٹہ میں شروع ہوگئی۔ کانفرنس کی سربراہی صوبائی وزیر صحت بلوچستان بخت محمد کاکڑ نے کی جبکہ کانفرنس میں سپیکر بلوچستان اسمبلی کیپٹن (ر)عبدالخالق اچکزئی، رکن صوبائی اسمبلی ڈاکٹر عبدالمالک بلوچ اور دیگر اعلی حکام نے شرکت کی۔

دو روزہ کانفرنس میں صوبے بھر کے ضلعی سطح کے محکمہ صحت کے افسران، سرکاری ہسپتالوں کے سربراہان اور بنیادی صحت کی سہولیات فراہم کرنے والے ادارے کے ضلعی معاونین شریک ہیں، جہاں ضلعی اور ہسپتالی سطح پر صحت کے نظام کی مجموعی کارکردگی کا تفصیلی جائزہ لیا جا رہا ہے۔کانفرنس کے افتتاحی اجلاس سے خطاب کرتے ہوئے سیکرٹری صحت مجیب الرحمن نے کہا کہ اس کانفرنس کا بنیادی مقصد صحت کے نظام میں موثر قیادت، ادارہ جاتی احتساب، خدمات کی بہتری اور ضلعی سطح پر کارکردگی کو مزید مستحکم بنانا ہے۔

انہوں نے اس امر پر زور دیا کہ صحت کی سہولیات کی فراہمی میں شفافیت، ذمہ داری اور موثر نگرانی کو یقینی بنائے بغیر عوام کو معیاری طبی خدمات فراہم کرنا ممکن نہیں لہذا تمام متعلقہ افسران کو اپنی ذمہ داریاں پوری دیانت داری اور پیشہ ورانہ صلاحیت کے ساتھ انجام دینی ہوں گی۔کانفرنس میں سپیکر بلوچستان اسمبلی کیپٹن (ر)عبدالخالق اچکزئی اور رکن صوبائی اسمبلی ڈاکٹر عبدالمالک بلوچ نے بھی شرکت کی۔ انہوں نے اپنے اپنے ڈویژنز کی کارکردگی کے جائزہ اجلاسوں، مباحثوں اور نگرانی کے عمل میں حصہ لیتے ہوئے صحت کے نظام میں بہتری، موثر منصوبہ بندی اور عوام کو معیاری طبی سہولیات کی فراہمی کے حوالے سے اپنی تجاویز پیش کیں۔

کانفرنس کے پہلے روز کوئٹہ، مکران، لورالائی اور قلات ڈویژنز کی ضلعی اور ہسپتالی کارکردگی کا تفصیلی جائزہ لیا گیا۔ جائزے کے دوران اے آئی پر مبنی حاضری کے نظام، ملازمین کی تفصیلات اور جانچ، مربوط نگرانی کے نظام سے حاصل ہونے والی رپورٹس، حفاظتی ٹیکہ جات کی کوریج اور دیگر اہم کارکردگی اشاریوں کی بنیاد پر ہر ضلع اور متعلقہ ادارے کی کارکردگی کا غیر جانبدارانہ تجزیہ کیا گیا۔اس موقع پر پولیو کے خاتمے اور حفاظتی ٹیکہ جات سے متعلق جاری اقدامات پر ایک خصوصی اجلاس بھی منعقد ہوا، جس میں متعلقہ حکام کو بیماری کے مکمل خاتمے کی حکمت عملی، حفاظتی ٹیکہ جات کی موجودہ صورتحال اور ان علاقوں کے بارے میں تفصیلی بریفنگ دی گئی جہاں ابھی مزید توجہ اور موثر اقدامات کی ضرورت ہے۔

کانفرنس کے دوران سخت احتسابی پالیسی کے تحت جائزہ عمل میں سامنے آنے والے قواعد و ضوابط کی خلاف ورزی اور عدم تعمیل کے تمام معاملات کو انتظامی کارروائی کے لیے باقاعدہ طور پر نشان زد کیا گیا تاکہ صحت کے نظام میں نظم و ضبط، شفافیت اور عوامی خدمت کے معیار کو مزید بہتر بنایا جا سکے۔کانفرنس کا دوسرا اور اختتامی اجلاس 4 جولائی 2026 کو منعقد ہوگا، جس کے بعد پہلے روز ہونے والے جائزوں، اہم فیصلوں، انتظامی اقدامات اور مستقبل کے لائحہ عمل پر مشتمل باضابطہ اعلامیہ جاری کیا جائے گا۔