اسلام آباد ۔ 15 فروری (اے پی پی) صدر مملکت ڈاکٹر عارف علوی نے ہدایت کی ہے کہ سول ایوارڈز کی منظوری میں میرٹ پر سختی سے عمل کیا جائے، سائنس، ٹیکنالوجی، تعلیم اور کاروبار کے شعبوں میں زیادہ ایوارڈ دیئے جانے چاہئیں۔ انہوں نے یہ بات سیکرٹری کابینہ کی طرف سے سول ایوارڈز پر دی جانے والی بریفنگ کے دوران کہی جس میں سول ایوارڈز عطاءکرنے کی کسوٹی اور طریقہ کار کے بارے میں بتایا گیا۔ جمعہ کو ایوان صدر سے جاری بیان کے مطابق صدر مملکت نے ہدایت کی کہ ایوارڈز کی منظوری میں میرٹ پر سختی سے عمل کیا جائے اور ایوارڈز کی درخواستوں کی مکمل اور تفصیلی سکروٹنی کی جائے۔ صدر مملکت نے کہا کہ ملک کا مستقبل سائنس اور ٹیکنالوجی سے وابستہ ہے لہٰذا سائنس، ٹیکنالوجی، تعلیم اور کاروبار کے شعبوں میں زیادہ ایوارڈ دیئے جائیں۔ صدر مملکت نے ہدایت کی کہ ایوارڈز دینے کی کسوٹی پر وقتاً فوقتاً نظرثانی کی جائے۔ صدر مملکت نے کہا کہ ایسی حکمت عملی بنائی جائے کہ جس سے سول ایوارڈز کی قدروقیمت میں اضافہ ہو۔ انہوں نے کہا کہ یہ ایوارڈز ملک و قوم کی خدمت کرنے والے شہریوں کی خدمات کو تسلیم کرنے کا بہترین ذریعہ ہیں۔
