لاہور۔26اگست (اے پی پی):وزیر ہاو سنگ اینڈ اربن ڈویلپمنٹ پنجاب بلال یاسین نے حلقے میں کھلی کچہری کے دوران مختلف یونین کونسلز کے علاقہ عمائدین کے مسائل سنے اور حل کرنے بارے احکامات جاری کیے۔صوبائی وزیر نے موجودہ سیاسی صورتحال اور ترقیاتی منصوبوں بارے لوگوں کو آگاہ کیا۔وزیر ہاو سنگ نے کہاکہ ضمنی انتخابات میں عوام مسلم لیگ ن کے امیدوار کوپنجاب حکومت کی کارکردگی کی بنیاد پرووٹ دیں گے،پنجاب کے تمام اضلاع ایک نئے روڈ میپ کے تحت ترقی کی ڈگر پر ڈالے جاچکے ہیں،
وزیر اعلی کی ہدایت پر آئے روز نئے منصوبوں کا آغاز کیا جارہا ہے، سیاسی مخالفین ذاتی کردار کشی کی بجائے کارکردگی پر بات کریں، پنجاب کے ہر ضلع میں صاف پانی، نکاسی آب، سڑکوں، پارکس اور ای بسوں کا نیٹ ورک بچھایا جارہا ہے۔ انہوں نے کہاکہ عام آدمی کے روزمرہ مسائل کو ترجیحی بنیادوں پر حل کرنے پر حکومت پنجاب کام کر رہی ہے، وزیر اعلی پنجاب کا دورہ جاپان صوبے میں ترقی کی نئی راہوں اور عالمی معاہدوں کا پیش خیمہ ثابت ہوگا، ترقی یافتہ ممالک کی کامیاب پالیسیوں اور بروقت اقدامات سے ہی چیلنجز پر قابو پایا جاسکتا ہے۔
