اسلام آباد۔22نومبر (اے پی پی): وفاقی وزیر برائے ماحولیاتی تبدیلی سینیٹر شیری رحمان نے کہا ہے کہ عمران خان گزشتہ سات ماہ سے امریکا اور اسٹیبلشمنٹ پر حکومت گرانے کے الزامات لگا رہے تھے، اچانک ان کو خیال آیا کہ ان کی حکومت گرانے میں کوئی بیرونی اور اندرونی سازش نہیں تھی،
منگل کو اپنے ٹویٹ میں انہوں نے کہا کہ امریکی لابنگ فرم کے ساتھ معاہدہ کرنے کے بعد عمران خان اپنے بیانیے سے مسلسل یو ٹرن لے رہے ہیں، بظاہر یہ جانتے تھے کہ عدم اعتماد میں کوئی بھی سازش شامل نہیں تھی ، وہ ایک آئینی اور پارلیمانی معاملہ تھا، لیکن اس سے سیاسی فائدہ اٹھانے کیلئے انہوں نے پاکستان کے عالمی تعلقات کو دائو پر لگا دیا۔
انہوں نے کہا کہ عمران خان نے حقیقی آزادی کے جھوٹے بیانیہ کی بنیاد پر ملک میں تقسیم، نفرت اور انتشار پھیلایا، ان کی نفرت انگیز سیاست سے جو ملک اور اداروں کا نقصان ہوا ،کیا ایک یو ٹرن لینے سے اس کا ازالہ ہو جائے گا؟ ان کی تمام سیاسی زندگی یو ٹرن میں ہی گزرے گی کیوں کہ ان کی سیاست ملک اور عوام سے نہیں بلکہ ان کے اپنے ذاتی مفادات سے جڑی ہوئی ہے۔
