اسلام آباد ۔ 29 دسمبر(اے پی پی)وازرت خزانہ کی جانب سے بطور چیئرمین تعیناتی کا نوٹیفیکیشن جاری ہونے کے بعد فرخ سبز واری سکیورٹیز اینڈ ایکس چینج کمیشن آف پاکستان (ایس ای سی پی) کے چیئرمین کی ذمہ داریاں سنبھال لیں گے۔ وفاقی کابینہ نے گزشتہ ماہ میں فرخ سبز واری کو ایس ای سی پی میں کمشنر تعینات کیا تھا اور طاہر محمود اس وقت ایس ای سی پی کے قائم مقام چیئرمین کے طور پر خدمات سر انجام دے رہے ہیں۔ ایس ای سی پی کے حکام نے کہا ہے کہ فرخ سبز واری کپیٹل اور سکیورٹیز مارکیٹ کا 25 سال سے زائد کا تجربہ رکھتے ہیں۔ انہوں نے پاکستان کے علاوہ سنگا پور، انڈونیشیا اور امریکہ کی سکیورٹیز مارکیٹ میں بھی کام کیا ہے۔ فرخ سبز واری نے انسٹی ٹیوٹ آف بزنس ایڈمنسٹریشن (آئی بی اے) سے بزنس ایڈمینسٹریشن میں ماسٹرز کیا ہے اور ایس ای سی پی میں کمیشنر تعینات ہونے سے قبل وہ پاکستان کی مالیاتی شعبہ کی ایک بڑی کمپنی بی ایم اے کپیٹل مینجمنٹ کے چیف ایگزیکٹو آفیسر کے طور پر خدمات سر انجام دے رہے تھے۔اس سے پہلے فرخ سبز واری سات سال تک سنگا پور کی ایک بڑی کمپنی کریڈٹ سوئس سکیورٹیز میں دو ہزار دس سے دو ہزار سترہ تک سنئیر عہدہ پر خدمات انجام دیتے رہے۔ اس سے پہلے کسب سکیورٹیز اور دیگر کئی اداروں میں بھی چیف ایگزیکٹو آفیسرکے عہدے پر فائز رہے۔
