فیصل آباد۔ 29 اگست (اے پی پی):ملک میں فوڈانڈسٹری کو فروغ دیکرسبزیوں و پھلو ں کو محفوظ کرکے اربوں روپے کے نقصان سے بچایاجاسکتاہے جبکہ اس ضمن میں خواتین کا کردار بھی انتہائی اہمیت کا حامل ہے جو پھلوں کو محفوظ کرکے گھریلو سطح پر مینگو سکوائش، شربت بادام، سیب کا جیم، آم کا جیم، آڑو کا سکوائش،امرود کی جیلی اور آلو بخارے کی چٹنی وغیرہ تیارکرکے جہاں گھرمیں کھانے کالطف دوبالا کرسکتی ہیں وہیں پھلوں اور سبزیوں کی بڑی مقدار کوضائع ہونے سے بھی بچایاجاسکتاہے۔
جامعہ زرعیہ فیصل آباد کے ترجمان نے کہا کہ مقامی زرعی تحقیقی ادارہ وقتاً فوقتاًخواتین کیلئے تربیتی ورکشاپس کا انعقادکررہا ہے جہاں تربیت حاصل کرکے خواتین گھریلو پیمانے پر مختلف مصنوعات جیم، جیلی، اچار، مربہ جات، چٹنیاں، سکوائش، و دیگر مشروبا ت تیار کر سکتی ہیں جوقیمت میں ارزاں اورغذائیت سے بھرپور ہونے کیساتھ ساتھ مضر صحت کیمیائی اجزاسے پاک ہوتے ہیں۔
انہوں نے کہا کہ زرعی ملک ہونے کے ناطے اللہ تعالی نے ہمیں وافر مقدار میں سبزیوں اور پھلوں سے نوازا ہے اسلئے اگر چہ فوڈ انڈسٹری میں پھلوں اور سبزیوں کی کچھ کھپت ہو جاتی ہے لیکن وہ بیرونی ممالک کے مقابلے میں کم ہے لہٰذااس بات کی اشد ضرورت ہے کہ سبزیوں اور پھلوں کو محفوظ کرنے اور انہیں ضائع ہونے سے بچانے کا شعور پیدا کیا جائے تاکہ ملک اربوں روپے کے نقصان سے بچ سکے۔
Short Link: https://urdu.app.com.pk/urdu/?p=383885
