قومی اسمبلی کے پارلیمانی کاکس آن چائلڈ رائٹس (پی سی سی آر) کا ’’پولیو فری پاکستان ایک قانون سازی کی ترجیح‘‘کے عنوان سے اجلاس کا انعقاد

اسلام آباد۔19نومبر (اے پی پی):قومی اسمبلی کے پارلیمانی کاکس آن چائلڈ رائٹس (پی سی سی آر) کا ’’پولیو فری پاکستان ایک قانون سازی کی ترجیح‘‘کے عنوان سے اجلاس بدھ کو پارلیمنٹ ہائوس میں منعقد ہوا۔ قومی اسمبلی سیکرٹریٹ کے مطابق اجلاس کی صدارت پی سی سی آر کی کنوینر ڈاکٹر نگہت شکیل خان نے کی اور اس میں پارلیمانی سیکرٹریز رعنا انصار، فرح ناز اکبر اور صبا صادق نے شرکت کی۔ ممبر پی سی سی آر ڈاکٹر شازیہ صوبیہ اسلم سومرو، پارلیمانی سیکرٹری برائے صحت سندھ محمد قاسم سومرو، ڈرافٹس مین قومی اسمبلی طاہر فاروق صحت اور مالیاتی ڈویژن کے افسران اور سول سوسائٹی کی تنظیموں کے نمائندے شریک ہوئے۔

ڈاکٹر نگہت شکیل خان نے پاکستان سے وائلڈ پولیو وائرس (WPV1) کے خاتمے کے لیے مضبوط قانون سازی کے اقدامات کی فوری ضرورت پر زور دیا۔ انہوں نے اس بات پر زور دیا کہ پولیو کا خاتمہ ایک آئینی اور اخلاقی ذمہ داری ہے، جس میں ترجیحی شعبوں کو اجاگر کرنا بشمول لازمی ویکسینیشن، ویکسین سے انکار کے خلاف روک تھام، پولیو سے متاثرہ بچوں کے لیے ریاستی تعاون، اور ایک پولیو کے خاتمے کے لئے جامع ایکٹ کی تشکیل شامل ہیں۔ انہوں نے پی سی سی آر کی کارکردگی ،نگرانی کے عمل کو مضبوط بنانے، صوبائی قانون سازی اور ملک گیر بیداری کے اقدامات کے عزم کو سراہا۔

پولیو پروگرام کے نیشنل کوآرڈینیٹر وزارت صحت کیپٹن (ر) انوار الحق نے وبائی امراض کی موجودہ صورتحال کا جائزہ پیش کیا۔ انہوں نے ملک بھر میں وائلڈ پولیو وائرس (WPV1) کے کیسز میں مجموعی طور پر کمی کو نوٹ کیا، ستمبر 2025 کے بعد سے کوئی کیس رپورٹ نہیں ہوا تاہم انہوں نے جنوبی خیبر پختونخوا میں بڑھتے ہوئے کیسز پر روشنی ڈالی جو کہ حالیہ دریافتوں میں 50 فیصد سے زیادہ ہیں۔ انہوں نے 2021-2025 تک کے سالوں کا ڈیٹا بھی شیئر کیا اور ملک بھر میں پانچ ترجیحی زونز کی نشاندہی کی اور صوبائی چیلنجز اور جاری ویکسینیشن مہم میں پیش رفت کا خاکہ پیش کیا۔

بحث کے دوران پارلیمنٹیرینز اور سول سوسائٹی کے اراکین نے آبادی کی نقل و حرکت، وفاقی-صوبائی ہم آہنگی میں خلاء، فرنٹ لائن ورکرز کی ناکافی تربیت، کمزور نگرانی اور پیریفیریل علاقوں میں جوابدہی اور زیادہ خطرے والے اضلاع میں والدین کے بڑھتے ہوئے انکار کی وجہ سے وائلڈ پولیو وائرس کے پھیلاؤ کے حوالے سے خدشات کا اظہار کیا۔ سوالات کا جواب دیتے ہوئے، کیپٹن (ر) انوار الحق نے جنوبی کے پی، کراچی اور حیدرآباد پر توجہ مرکوز کرنے کی ضرورت پر زور دیا اور کہا کہ ان علاقوں میں انکار کی شرح سب سے زیادہ ہے۔

انہوں نے اس بات پر زور دیا کہ معمول کی حفاظتی ٹیکوں، ملک گیر مہمات، اور کمیونٹی کی مستقل شمولیت عوامی اعتماد کو بڑھانے کے لیے ضروری ہے۔ اختتامی سیشن میں شرکاء نے پولیو کے خاتمے کے لیے بچوں پر مبنی، کمیونٹی پر مبنی نقطہ نظر کی سفارش کی۔ اس بات پر زور دیا گیا کہ کم وزن اور طبی لحاظ سے کمزور بچوں کے لئےحفاظتی ٹیکوں کو یقینی بنانے کے لیے اضافی توجہ مرکوز کی جائے۔

غلط معلومات کے سدباب اور ویکسین کی قبولیت کو فروغ دینے کے لیے نچلی سطح پر ماؤں کی کمیٹیوں کے قیام کی تجویز دی گئی۔ مزید سفارشات میں کولڈ چین سسٹم کو مضبوط بنانا، پولیو ورکرز کے لیے موثر نگرانی کے طریقہ کار کو یقینی بنانا، نوجوان بالغوں کو ویکسینیشن کے نظام میں شامل کرنا جو کیریئر کے طور پر کام کر سکتے ہیں،میڈیا اور کہانی پر مبنی مہمات کے ذریعے عوامی آگاہی کو بڑھانا شامل ہیں۔