فیصل آباد۔ 30 اگست (اے پی پی):جامعہ زرعیہ فیصل آباد کے ماہرین زراعت نے آجکل شام کو چلنے والی ٹھنڈی ہواؤں کو فصلات کیلئے مفید قرار دیا ہے اور کہاہے کہ چونکہ حالیہ شدید گرم موسم، سخت حبس اور ماحولیاتی تغیرات کے باعث کپاس، دھان، کماد، سبزیوں، پھلوں، چارہ جات کی فصلیں شدید جھلساؤ کا شکار تھیں لہٰذا مون سون کی حالیہ بارشوں کے بعد شام کو ٹھنڈی ہواؤں کے چلنے سے حبس اور گرم لو کے اثرات میں کچھ کمی واقع ہوئی ہے جس کے فصلات پر مثبت اثرات مرتب ہوں گے۔
انہوں نے بتایاکہ کپاس کی فصل پر گرمی کی شدت کی وجہ سے رس چوسنے والے کیڑوں بالخصوص سفید مکھی، سبز تیلا، تھرپس، مائٹس وغیرہ کاحملہ بڑھ رہاتھااور وائرس میں شدت بھی مشاہدے میں آ رہی تھی۔ انہوں نے کہاکہ اب شام کو ٹھنڈی ہوائیں چلنے اور معتدل بارشوں کے باعث فصلات کو کافی حد تک فائدہ پہنچے گا جس سے بہتر پیداوار حاصل ہونے کا بھی امکان ہے۔
Short Link: https://urdu.app.com.pk/urdu/?p=384205
