کوئٹہ۔25دسمبر (اے پی پی):وزیراعلیٰ بلوچستان جام کمال خان نے کرسمس کے موقع پر تہنیتی پیغام دیتے ہوئے کہا ہے کہ کرسمس کےموقع پر مسیحی برادری کو دلی مبارکباد پیش کرتا ہوں،اپنے جاری کردہ بیان میں وزیراعلیٰ بلوچستان جام کمال خان نے کہا ہے کہ حضرت عیسیٰ ؑ کے یوم پیدائش کی مناسبت سے منایا جانے والا یہ دن مسلمانوں کے لئے بھی مبارک ہے۔ آج مسلمان بھی مسیحی برادری کی خوشیوں میں برابر کے شریک ہیں دنیا بھر کو دہشت گردی اور امن وامان کی صورت میں درپیش سنگین خطرات سے نمٹنے کے لئے حضرت عیسیٰ ؑ کے امن وسلامتی کے پیغام کو عام کرنے کی ضرورت ہے۔وزیر اعلی بلوچستان جام کمال نےمزید کہا کہ مسیحی برادری ملک وقوم کی تعمیر وترقی کے لئے اپنی تمام تر صلاحیتیں بروئے کار لارہی ہے جو قابل تحسین ہے،حکومت صوبے میں آباد تمام اقلیتوں بشمول مسیحی برادری کے حقوق کے تحفظ کو یقینی بنارہی ہے،ملازمتوں میں اقلیتوں کے لئے مختص کوٹہ پر عملدرآمد کیا جارہا ہے انہوں نےمزید کہا کہ مسیحی برادری سمیت ملک اور بلوچستان میں بسنے والی دیگر تمام اقلیتوں کو اپنی مذہبی عبادات کی ادائیگی کی مکمل آزادی حاصل ہے جس کی مثال دنیا بھر میں نہیں ملتی۔مسیحی برادری اپنی خوشیوں میں ان افراد کو بھی شریک رکھیں جو کرسمس منانے کی استطاعت نہیں رکھتےاوراپنی عبادات میں ملک وقوم کے استحکام اور خوشحالی کے لئے خصوصی دعائیں مانگیں۔
