اسلام آباد۔25دسمبر (اے پی پی):وزیراعظم عمران خان نے کرسمس کے موقع پر پاکستان سمیت دنیا بھر کی عیسائی برادری کو مبارکباد پیش کرتے ہوئے کہا ہے کہ آئین پاکستان اقلیتوں کے حقوق کا تحفظ کرتا ہے، مسیحی برادری کی ملک کے لئے مخلصانہ اور گراں قدر خدمات ہمیشہ قابل تحسین رہی ہیں، حکومت پاکستان عقیدہ، مسلک یا مذہب سے قطع نظر تمام شہریوں کی آزادی کو مقدس رکھتی ہے اور تمام اقلیتوں کو حاصل حقوق اور مراعات کا تحفظ جاری رکھے گی۔
وزیراعظم نے کرسمس کے موقع پر اپنے پیغام میں کہا کہ اس مبارک دن میں حکومت پاکستان اور پاکستانی عوام کی طرف سے دنیا بھر کی عیسائی برادری کو دلی مبارکباد پیش کرتا ہوں جو آج کے دن کو عقیدت و احترام کے ساتھ منا رہے ہیں۔ کرسمس کی تقریبات ہمیں عالمگیر محبت، بھائی چارے، رواداری اور قربانی نفس کا سبق سیکھاتی ہیں جو کسی بھی معاشرے کی ترقی کا باعث بنتی ہیں۔انہوں نے کہاکہ حضرت عیسیٰ علیہ السلام کی پیدائش پوری انسانیت اور دنیا کے لیے امن، بھائی چارے، رواداری اور عقیدت کی علامت سمجھی جاتی ہے۔
انہوں نے نہ صرف بیمار انسانیت کو شفا بخشی بلکہ رواداری، محبت اور ہمدردی جیسی اقدار کی بھی تبلیغ کی، انہوں نے لوگوں کی نیک زندگی گزارنے کی طرف رہنمائی کی اور خدا کی رحمت حاصل کرنے کی تلقین کی، اللہ کے پیغمبر کی حیثیت سے حضرت عیسیٰ علیہ السلام کی تعلیمات تمام مذاہب کے ماننے والوں کے لیے ہیں۔
وزیراعظم نے کہاکہ ملک کے دفاع، تعلیم، صحت اور معاشی ترقی کے شعبوں میں مسیحی برادری کی مخلصانہ اور گراں قدر خدمات ہمیشہ قابل تحسین رہی ہیں، ریاست کے مساوی شہری ہونے کے ناطے حکومت انہیں قومی ترقی کے لیے اپنی صلاحیتوں کو بروئے کار لانے کا اختیار دے گی۔
انہوں نے کہاکہ ہماری پالیسیاں تمام مذاہب کے لوگوں کے درمیان ہم آہنگی اور اتفاق پیدا کرنے کے لیے تیار کی گئی ہیں،حکومت اقلیتوں کو قومی دھارے میں شامل کرنے کے لیے اقدامات کو اپنا فرض سمجھتی ہے تاکہ وہ معاشرے میں فعال شہری کے طور پر اپنا کردار مثبت انداز میں ادا کر سکیں اور اس ملک کو ترقی کی راہ پر گامزن کرنے میں مدد کریں۔
انہوں نے کہاکہ ہمارا آئین قائداعظم کے وژن کو بیان کرتا ہے اور اقلیتوں کے جائز مفادات کا تحفظ کرتا ہے، قائداعظم نے تمام برادریوں کے لیے مذہبی آزادی اور تحفظ کی یقین دہانی کرائی تھی چاہے وہ کسی بھی مذہب، پیشے اور نسل سے تعلق رکھتے ہوں۔
وزیراعظم نے کہاکہ حکومت پاکستان عقیدہ، مسلک یا مذہب سے قطع نظر تمام شہریوں کی آزادی کو مقدس رکھتی ہے اور تمام اقلیتوں کو حاصل حقوق اور مراعات کا تحفظ جاری رکھے گی۔ انہوں نے کہاکہ ہم ایک ایسے معاشرے کی تعمیر کے لیے پرعزم ہیں جو اختلاف رائے کا احترام کرے، تنوع میں طاقت پائے ، روادار اور ہم آہنگ ہو اور ایک ایسی ریاست جہاں تمام شہریوں کو مساوی حقوق اور مواقع میسر ہوں ۔
