اسلام آباد۔28اپریل (اے پی پی):وزیراعظم کی جانب سے ٹیکس ریٹس کو منصفانہ بنانے کے لئے تشکیل دی گئی کمیٹی کا اجلاس پیر کو وزیراعظم کے معاونِ خصوصی ہارون اختر خان کی زیرِ صدارت منعقد ہوا۔اجلاس میں بلند ٹیکس شرحوں اور مقامی صنعتوں کو مراعات کی عدم فراہمی کے باعث درپیش چیلنجز پر تبادلہ خیال کیا گیا۔
اس موقع پر ہارون اختر خان نے کہا کہ وزیراعظم نے یہ کمیٹی مسائل کی نشاندہی اور قابلِ عمل حل تجویز کرنے کے لئے تشکیل دی ہے۔ہارون اختر خان نے زور دیتے ہوئے کہا کہ خطے میں معاشی مقابلے کی صلاحیت حاصل کرنے کے لئے پاکستان کو ان بنیادی مسائل کا حل نکالنا ہوگا۔ انہوں نے نشاندہی کی کہ بلند ٹیکس شرحوں کی وجہ سے صنعتی شعبہ شدید متاثر ہو رہا ہے اور متعدد کاروبار بند ہو چکے ہیں۔
ہارون اختر خان نے کہا کہ ہمیں بیمار صنعتوں کو بحال کرنا اور کام کرنے والی صنعتوں کو مزید وسعت دینا ہوگی۔انہوں نے مزید بتایا کہ کمیٹی اپنی سفارشات اور مجوزہ حل وزیراعظم کو پیش کرے گی تاکہ انہیں آئندہ بجٹ میں شامل کیا جا سکے۔ہارون اختر خان نے کمیٹی کے اراکین کو ہدایت کی کہ وہ اگلے اجلاس میں ٹھوس حل اور قابلِ عمل سفارشات پیش کریں۔
Short Link: https://urdu.app.com.pk/urdu/?p=589224
