اسلام آباد۔13اپریل (اے پی پی):تحریک آزادی کشمیر کے پرجوش حامی، مصنف اور دانشور پروفیسر خورشید احمد برطانیہ میں انتقال کر گئے۔و ہ جماعت اسلامی کے نائب امیر اورسینیٹر بھی رہے۔ ان کی عمر 93 سال تھی۔کشمیر میڈیا سروس کے مطابق پروفیسر خورشید احمد کا انتقال برطانیہ کے شہرلیسٹر میں ہوا۔ وہ معاشی امور کے ماہر اورکئی کتابوں کے مصنف تھے۔
مرحوم جماعت اسلامی کے بانی سید ابو الاعلیٰ مودودی کے دیرینہ ساتھیوں میں شامل تھے۔ پروفیسر خورشید احمد کو اسلام کیلئے خدمات پر 1990 میں کنگ فیصل ایوارڈ دیا گیا، اس کے علاوہ انہیں حکومت پاکستان کی جانب سے 2011 میں نشان امتیاز سے بھی نوازا گیا۔
پروفیسرخورشید کو پہلا اسلامی ترقیاتی بینک ایوارڈ بھی عطا کیاگیا۔ امیر جماعت اسلامی حافظ نعیم الرحمان،نائب امیر لیاقت بلوچ اوردیگر رہنمائوں نے پروفیسر خورشید احمد کے انتقال پرگہرے دکھ اورافسوس کا اظہار کیا ہے۔
Short Link: https://urdu.app.com.pk/urdu/?p=581415
