ملتان۔ 15 فروری (اے پی پی):محکمہ زراعت اور نجی کھاد کمپنی کے باہمی اشتراک سے ہفتہ کے روز یہاں کپاس کی اگیتی کاشت بارے میگا سیمینارکا انعقاد کیا گیا۔جس میں ممبران صوبائی اسمبلی رانا محمد سلیم، ملک لال محمد جوئیہ، سابق ایم پی اے رانا اعجاز احمد نون،سیکرٹری زراعت پنجاب افتخار علی سہو اور محکمہ زراعت کے افسران سمیت دوہزار سے زائد کاشتکاروں نے شرکت کی۔
اس موقع پر خطاب کرتے ہوئے سیکرٹری زراعت پنجاب افتخار علی سہو نے کہا کہ کپاس ملکی معیشت میں کلیدی اہمیت کی حامل ہے،امسال کپاس کی اگیتی کاشت کیلئے 10لاکھ ایکڑ رقبہ کا ہدف مقرر کیا گیا ہے۔انہوں نے کہا کہ کپاس کی کاشت کے ہدف کے حصول کیلئے تمام ممکنہ وسائل و ذرائع بروئے کار لائے جا رہے ہیں،کپاس کی اگیتی کاشت کے کل ہدف کا قریباً 40فیصد ملتان ڈویژن میں کاشت ہوگا،کپاس کی اگیتی کاشت کاآغاز ہوچکا ہے۔
سیکرٹری زراعت پنجاب نے مزید کہا کہ وزیر اعلیٰ پنجاب مریم نواز شریف کی جانب سے کپاس کی اگیتی کاشت کرنے والے کسانوں کیلئے25ہزار روپے مالی اعانت کا فیصلہ کیا گیا ہے،کپاس کی کلائمیٹ سمارٹ اقسام کی دریافت کیلئے زرعی سائنسدانوں کو خصوصی ٹاسک دیا گیا ہے،زرعی ماہرین کو کم از کم 40 من فی ایکڑ پھٹی کی پیداوار والی اقسام دریافت کرنے کی ذمہ داری سونپی گئی ہے۔
انہوں نے واضح کیا کہ معیاری زرعی مداخل کی سستے داموں دستیابی یقینی بنانے کیلئے عملی اقدامات اٹھائے جا رہے ہیں،کپاس کی اگیتی کاشت کے ہدف کا حصول یقینی بنانے کیلئے تمام سٹیک ہولڈرز کو عملی کردار ادا کرنا ہوگا، کپاس کی اچھی پیداواری صلاحیت کے بیجوں کی مارکیٹوں میں دستیابی یقینی بنائی جارہی ہے،کپاس کی آگاہی مہم میں نجی شعبہ کا تعاون قابل ستائش ہے۔انہوں نے مزید کہا کہ کپاس کے ہدف کے حصول کیلئے کاشتکاروں کا بھرپور تعاون ضروری ہے۔
Short Link: https://urdu.app.com.pk/urdu/?p=561214
