کوئٹہ۔ 31 جولائی (اے پی پی):گورنر بلوچستان جعفر خان مندوخیل نے کہا کہ ملک و قوم کی تعمیر وترقی میں سیاسی تنظیم کو وین گارڈ کی حیثیت حاصل ہے،موجودہ حکومت کی دانشمندانہ اقدامات کی بدولت ملک معاشی مشکلات سے نکل چکا ہے ۔ عوام میں اپنے حقوق و فرائض کا اجتماعی احساس جگانے، سماجی انصاف کا بول بالا کرنے، جمہوری رویوں کو فروغ دینے اور عوامی حقوق و اختیارات کی پاسداری کو یقینی بنانے میں سیاسی تنظیمیں اور سیاسی کارکنان کلیدی کردار ادا کرتے ہیں۔
اس ضمن میں تمام نومنتخب عوامی نمائندوں کی سیاسی اور سماجی ذمہ داری ہے کہ وہ لوگوں تقسیم کرنے کی بجائے متحد کرنے کیلئے شعوری کاوشیں کریں اور اپنے انتخابی حلقوں میں بےآواز اور بےسہارہ لوگوں کے حقوق اور مفادات کی بھرپور وکالت کریں۔
ان خیالات کا اظہار انہوں نے بدھ کے روز گورنر ہاوس کوئٹہ میں سابق صوبائی وزیر میر مجیب الرحمن محمد حسنی، سابق ایم این اے میر احسان ریکی اور ڈسٹرکٹ چیئرمین عرفان ریکی سے ملاقات کے دوران بات چیت کرتے ہوئے کیا۔ اس موقع پر گورنر بلوچستان جعفرخان مندوخیل نے کہا کہ موجودہ حکومت کی دانشمندانہ اقدامات کی بدولت ملک معاشی مشکلات سے نکل چکا ہے اور اب ضروری کہ عوام کیلئے معاشی و تجارتی سرگرمیوں کو فروغ دیکر آسانیاں پیدا کریں۔گورنر مندوخیل نے کہا کہ نو منتخب عوامی نمائندوں کی ذمہ داری ہے کہ وہ قانون سازی کے ذریعے ایسی عوام دوست پالیسیاں تشکیل دیں تاکہ ان پر عمل درآمد کرنے سے تمام عوامی حقوق اور بنیادی آزادیوں کی حفاظت کیلئے راہ ہموار ہو سکے۔
انہوں نے کہا کہ تقریباً پچھلے4دہائیوں سے پریکٹیکل پولیٹکس سے وابستگی کے نتیجے میں ادراک حاصل ہوا ہے کہ کوئی بھی سیاسی تنظیم شفافیت، ذمہ داری اور جوابدہی کی راہ پر گامزن ہوکر ضروری کامیابی سے ہمکنار ہوتی ہے۔انہوں نے کہا کہ جاری ترقیاتی منصوبوں کو جلد پایہ تکمیل تک پہنچا کر ان کے ثمرات عام آدمی تک پہنچانے کی اشد ضرورت ہے اور اسی میں جمہوریت کو مضبوط بنانے راز ہے۔
