نئے افسران محنت، دیانتداری اور پیشہ وارانہ مہارت سے کام کریں،ڈی جی ایل ڈی اے

لاہور۔28جولائی (اے پی پی):ڈائریکٹر جنرل لاہور ڈویلپمنٹ اتھارٹی طاہر فاروق نےپبلک سروس کمیشن کے ذریعے جوائن کرنے والے 33 اسسٹنٹ ڈائریکٹر ٹائون پلاننگ سے ملاقات کی اور انہیں خوش آمدید کہا۔اس موقع پر افسران سے گفتگو کرتے ہوئےانہوں نے کہا کہ ایل ڈی اے جوائن کرنے والے نئے افسران پاکستان کی بہترین جامعات سے تعلیم یافتہ ہیں۔نئے افسران محنت، دیانتداری اور پیشہ وارانہ مہارت سے کام کریں۔عام آدمی کو بہترین سروس ڈیلیوری مہیا کرنا اولین ترجیح ہونا چاہیے۔ایل ڈی اے میں آئی ٹی بیسڈ ریفارمز جاری ہیں، آئندہ دور آئی ٹی اصلاحات کا ہے۔نوجوان افسران نئے رجحانات متعارف کرائیں، کارپوریٹ سیکٹر طرز پر اصلاحات کرنے والوں کی حوصلہ افزائی کریں گے۔

انہوں نے کہا کہ افسران اپنے کیرئیر میں سخت محنت اور لگن سے کام کریں۔ایل ڈی اے پبلک آرگنائزیشن ہے۔انہوں نے کہا کہ نئے افسران کو اپنے کام اور رویہ سے شہریوں کو مطمئن کرناہے۔ڈی جی ایل ڈی اے نے نئے افسران کو ہدایت کی کہ آپ نے دوران ڈیوٹی بہت کچھ سیکھناہوگا۔ڈی جی ایل ڈی اے طاہر فاروق نے نئے افسران کو مختلف ونگز میں لگانے اور ورکنگ اورینٹیشن کرانے کی ہدایت کی۔اس موقع پر ایڈیشنل ڈی جی ہیڈکوارٹر، ایڈیشنل ڈی جی یوپی، چیف ٹائون پلانرز، چیف میٹرو پولیٹن پلاننگ، ڈائریکٹر ڈی جی ہیڈ کوارٹر بھی موجود تھے۔