اسلام آباد۔26اکتوبر (اے پی پی):نائب وزیراعظم و وزیر خارجہ سینیٹر محمد اسحاق ڈار نے نیوزی لینڈ کے نائب وزیراعظم و وزیر خارجہ ونسٹن پیٹرز سے ملاقات کی ہے۔ ترجمان دفتر خارجہ کی جانب سے ہفتہ کو جاری اعلامیہ کے مطابق سینیٹر محمد اسحاق ڈارنے ساموا میں دولت مشترکہ کے سربراہان حکومت (سی ایچ او جی ایم)کے اجلاس کے موقع پر نیوزی لینڈ کے وزیر خارجہ سے ملاقات کی ۔
اس موقع پر نائب وزیراعظم نے دونوں ممالک کے درمیان تعلقات کو مزید وسعت دینے کے حوالے سے دستیاب مواقع سے استفادہ کرنے کی ضرورت پر زور دیا۔ اس موقع پر دونوں رہنمائوں نے باہمی مفادات کےلئے تمام شعبوں میں دونوں ممالک کے درمیان وسیع تعلقات کی مشترکہ راہیں تلاش کرنے پر بھی اتفاق کیا۔ نائب وزیراعظم اور وزیرخارجہ ونسٹن پیٹرز نے دوطرفہ تجارتی تعلقات کووسعت دینے ، تجارت و سرمایہ کاری ، تعلیم اور عوام سے عوام کے رابطوں میں دوطرفہ تعاون کے فروغ کی ضرورت پر بھی زور دیا۔
اقوام متحدہ میں پاکستان کے مختلف اقدامات کی توثیق پر نیوزی لینڈ سے اظہار تشکر کرتے ہوئے وزیرخارجہ نے کہا کہ دونوں ممالک مشترکہ وراثت اور مشترکہ اخلاقیات کے ذریعے ایک دوسرے سے منسلک ہیں اور موثر کثیر الجہتی ، جمہوری اور انسانی عزت و وقار کو تقویت دینے میں مشترکہ مفادات کے حامل ہیں۔
Short Link: https://urdu.app.com.pk/urdu/?p=517187
