اسلام آباد۔7جولائی (اے پی پی):نائب وزیر اعظم اور وزیر خارجہ سینیٹر محمد اسحاق ڈار سے اتصالات گروپ یو اے ای کے ایک وفد نے پیر کو یہاں ملاقات کی۔ دفتر خارجہ کی جانب سے جاری بیان کے مطابق وفد کی قیادت گروپ کے سی ای او حاتم دوئیدار نے کی۔ اجلاس میں وزیر آئی ٹی کے علاوہ وزیراعظم کے معاون خصوصی طارق باجوہ، نیشنل کوآرڈینیٹر ایس آئی ایف سی، سیکرٹریز آئی ٹی اینڈ کامرس اور پرائیویٹائزیشن اور وزارت خارجہ کے سینئر حکام نے شرکت کی۔
نائب وزیراعظم نے پاکستان کی بڑھتی ہوئی ڈیجیٹل معیشت اور کاروبار دوست ماحول کو فروغ دینے کے لئے حکومت کے عزم پر روشنی ڈالی۔ انہوں نے اتصالات گروپ کو ملک کے آئی سی ٹی اور ٹیلی کام کے شعبوں میں سرمایہ کاری بڑھانے کی دعوت دی۔ گروپ کے سی ای او حاتم دوئیدار نے حکومت پاکستان کی مسلسل حمایت کو سراہا اور اتصالات گروپ کی پاکستانی مارکیٹ کے ساتھ طویل مدتی عزم کی توثیق کرتے ہوئے ڈیجیٹل ترقی اور رابطے کے اہداف میں حصہ ڈالنے میں گہری دلچسپی کا اظہار کیا۔
