لاہور۔25 جنوری(اے پی پی ) ماضی کی مشہور اداکارہ روحی بانو طویل علالت کے بعد جمعہ کے روز ترکی میں انتقال کرگئیں۔اداکارہ کی بہن روبینہ یاسمین کے مطابق روحی بانو استنبول کے ہسپتال میں زیر علاج اور گذشتہ 10 روز سے وینٹی لیٹر پر تھیں، رات گئے ان کی طبیعت اچانک بگڑ گئی اور وہ دنیائے فانی سے کوچ کر گئیں۔انہوں نے بتایا کہ روحی بانو گردوں کے عارضے میں مبتلا اور طویل عرصے سے نفسیاتی مرض شیزوفرینیا کا شکار تھیں۔ روحی بانو 10 اگست 1951ءکو کراچی میں پیدا ہوئیں،وہ اعلیٰ تعلیم یافتہ تھیں ، بے ساختہ و قدرتی اداکاری روحی بانو کا خاصہ تھا۔انہوں نے کئی مشہور ڈراموں میں اداکاری کے جوہر دکھائے، جن میں کرن کہانی، زرد گلاب، دروازہ اور اشتباہ نظر شامل ہیں۔ روحی بانو کو صدارتی تمغہ برائے حسن کارکردگی سے بھی نوازا گیا،ان کے اکلوتے بیٹے علی کے قتل کے بعد سے گویا زندگی کی تمام رعنائیاں ان سے چھِن گئیں اور لاہور میں واقع نفسیاتی ہسپتال ‘فاونٹین ہاوس’ ان کا مسکن بن گیا۔لاہور کے علاقے گلبرگ تھری میں روحی بانو کا اپنا گھر بھی ہے، جو اب کھنڈر میں تبدیل ہو چکا ہے۔
