نجکاری کمیشن بورڈ کا اجلاس، اسلام آباد انٹرنیشنل ایئرپورٹ کی نجکاری کیلئے ممکنہ مالیاتی مشاورتی خدمات کے معاہدے(FASA) کی شرائط پر بات چیت کیلئے مذاکراتی کمیٹی تشکیل

اسلام آباد۔18فروری (اے پی پی):نجکاری کمیشن بورڈنے بدھ کو وزیراعظم کے مشیر برائے نجکاری اور چیئرمین نجکاری کمیشن محمد علی کی سربراہی میں اپنے 248ویں اجلاس میں ایشین ڈویلپمنٹ بینک (اے ڈی بی ) کے ساتھ اسلام آباد انٹرنیشنل ائیر پورٹ کی نجکاری کے سلسلے میں ممکنہ مالیاتی مشاورتی خدمات کے معاہدے(FASA) کی شرائط پر بات چیت کے لیے ایک مذاکراتی کمیٹی تشکیل دی۔

یہ فیصلہ پرائیویٹائزیشن کمیشن (ہائرنگ آف فنانشل ایڈوائزر ) ریگولیشنز ، 2018 کے تحت ایشین ڈویلپمنٹ بنک کے ساتھ براہ راست مذاکرات شروع کرنے کے بورڈ کے پہلے فیصلے کا تسلسل ہے۔مذاکراتی کمیٹی کو یہ ذمہ داری دی گئی ہے کہ وہ قابل اطلاق ریگولیٹری فریم ورک کے مطابق مذاکرات کرے اور اپنی سفارشات بورڈ کو غور اور منظوری کے لیے پیش کرے۔

مجوزہ ٹرانزیکشن میں ایک کھلے اور مسابقتی عمل کے ذریعے رعایتی ماڈل کے تحت ہوائی اڈے کے آپریشنز کی آئوٹ سورسنگ کا ارادہ کیا گیا ہے، جس کا مقصد آپریشنل کارکردگی کو بڑھانا اور خدمات کی فراہمی کے معیار کو بہتر بنانا ہے جبکہ حکومت پاکستان کے لیے زیادہ سے زیادہ قدر کی وصولی کو یقینی بنانا ہے۔

ایک مزید ایجنڈا آئٹم کے تحت بورڈ نے قانونی تقاضوں کے مطابق مالی سال 2024-25 کے لیے نجکاری کمیشن کے آڈٹ شدہ مالیاتی گوشواروں کا جائزہ لیا اور ان کی منظوری دی۔ نجکاری کمیشن بورڈ نے نجکاری کے تمام لین دین کو شفاف، مسابقتی اور اصول پر مبنی طریقے سے کرنے کے اپنے عزم کا اعادہ کیا تاکہ عوامی مفادات کے تحفظ اور قومی خزانے کے لیے زیادہ سے زیادہ قیمت حاصل کی جا سکے۔