گوجرانوالہ۔ 04 ستمبر (اے پی پی):نگران وزیراعلیٰ پنجاب محسن نقوی نے لاہور،سیالکوٹ موٹروے کے ساتھ گوجرانوالہ کو لنک کرنے کیلئے زیر تعمیر دو رویہ سڑک کے پراجیکٹ کاتفصیلی دورہ کیا ہے۔چیف سیکرٹری،سیکرٹری تعمیر ات ومواصلات، کمشنر گوجرانوالہ، آرپی او،ڈپٹی کمشنر اور فرنٹیئر ورکس آرگنائزیشن کے حکام بھی اس موقع پر موجود تھے۔
وزیراعلیٰ نے15.2کلومیٹر طویل دو رویہ سڑک کے پورے روٹ کا معائنہ کیا اور تعمیراتی کاموں کا جائزہ لیا،انہوں نے متعلقہ حکام کو ہدایت کی کہ پراجیکٹ کو مقررہ مدت میں مکمل کرنے کیلئے اضافی وسائل بروئے کار لائے جائیں ،اس موقع پر نگران وزیراعلی کو پراجیکٹ ڈائریکٹر کرنل عمران ارشد نے بریفنگ دی اوربتایاگیا کہ 15.2کلو میٹر طویل لنک روڈ کاتقریباً 50فیصد ارتھ ورک مکمل ہوچکاہے
،دو رویہ کا ر پٹیڈ سڑک مو ٹر وے کیلئے بہترین رسائی فراہم کرے گی جسے واہنڈو انٹرچینج سے بے نظیر چوک تک دو رویہ سڑک کے ذریعے گوجرانوالہ سے لنک کیا جائے گا،منصوبے کی تکمیل سے گوجرانوالہ سے لاہور کا سفر 45 منٹ رہ جائے گا،جبکہ بینظیر چوک سے واہنڈو انٹر چینج تک زیر تعمیر روڈ پر 6پل، 22باکس،23پائپ کلورٹس،5جانوروں کی گزر گاہیں اور 5سب ویز بھی تعمیر کئے جارہے ہیں۔رائٹ آف وے سے تمام سروسز کی منتقلی کا عمل مکمل کر لیا گیا ہے۔
Short Link: https://urdu.app.com.pk/urdu/?p=386600
