اسلام آباد۔8فروری (اے پی پی):نگران وزیر اعظم انوار الحق کاکڑ نے عام انتخابات 2024 کے کامیاب انعقاد پر قوم کو مبارکباد پیش کرتے ہوئے کہا کہ دعا ہے کہ یہ الیکشن پاکستان کے روشن اور خوشحال مستقبل کی نوید ثابت ہوں۔ جمعرات کو اپنے ایک ٹویٹ میں وزیر اعظم نے کہا کہ انتخابات کے کامیاب انعقاد پر پوری قوم کا تہہ دل سے شکریہ ادا کرتا ہوں، میں الیکشن کمیشن آف پاکستان، نگران صوبائی حکومتوں، مسلح افواج، سول آرمڈ فورسز، پولیس، قانون نافذ کرنے والے اداروں، انتخابی عملے، میڈیا اور ان تمام اداروں اور افراد کی کاوشوں کو سراہتا ہوں جنہوں نے آزادانہ اور منصفانہ انتخابات کے انعقاد میں کردار ادا کیا۔
وزیر اعظم نے کہا کہ یہ اہم موقع نہ صرف ہمارے جمہوری عمل کے استحکام اور مضبوطی بلکہ پاکستانی عوام کے ناقابل تسخیر جذبے کا بھی ثبوت ہے۔ انہوں نے کہا کہ پاکستان کے عوام کی شرکت اور جوش و خروش اس جمہوری عمل کا سنگ بنیاد رہا ہے، ووٹروں کا زیادہ ٹرن آؤٹ ہمارے ملک کے مستقبل کے لئے عوامی عزم کا واضح اشارہ ہے۔ انہوں نے کہا کہ ووٹ کے ذریعے حق رائے دہی کے اظہار سے ہماری جمہوریت مضبوط ہو گی اور اس کے لئے پاکستانی عوام تحسین کے مستحق ہیں۔
وزیر اعظم نے کہا کہ خیبرپختونخوا اور بلوچستان میں دہشت گردی کے چند واقعات کے باوجود ملک بھر میں آزادانہ اور منصفانہ انتخابات کے انعقاد کے لئے مسلح افواج، سول آرمڈ فورسز، ایل ای اے، سویلین ایڈمنسٹریشن اور الیکشن کمیشن آف پاکستان کی کاوشیں قابل تعریف ہیں، اپنے فرائض سے ان کی غیر متزلزل وابستگی انتخابات کے پرامن انعقاد میں اہم کردار ادا کرتی رہی ہے۔
وزیر اعظم نے کہا کہ پاکستانی عوام نے مشکلات کا سامنا کرتے ہوئے غیر معمولی ہمت اور عزم کا مظاہرہ کیا ہے، دہشت گردی کے حالیہ واقعات کے باوجود عوام کا جذبہ اور انتخابی عمل میں ان کی شرکت ہمارے ملک کو عدم استحکام سے دوچار کرنے کے لئے سرگرم قوتوں کے خلاف ایک طاقتور بیان ہے ۔ انہوں نے کہا کہ یہ امن، استحکام اور خوشحالی کے لئے ہماری اجتماعی خواہش کی عکاسی کرتا ہے۔ وزیر اعظم نے کہا کہ ایک بار پھر میں اس تاریخی کامیابی پر قوم کو مبارکباد دیتا ہوں، دعا ہے کہ یہ الیکشن پاکستان کے روشن اور خوشحال مستقبل کی نوید ثابت ہوں۔
