نیشنل ہائی ویز اینڈ موٹروے پولیس کی ٹریول ایڈوائزری جاری

اسلام آباد۔23مارچ (اے پی پی):نیشنل ہائی ویز اینڈ موٹروے پولیس نے عید کی تعطیلات کے اختتام پر ملک بھر کی شاہراہوں پر ٹریفک کے بڑھتے ہوئے غیر معمولی دباؤ کے پیشِ نظر ایک جامع ٹریول ایڈوائزری جاری کر دی ہے۔ ترجمان موٹروے پولیس نے کہا ہے کہ عید کے بعد واپسی کے سفر کے باعث موٹرویز اور ہائی ویز پر گاڑیوں کے بہاؤ میں نمایاں اضافہ ہو گیا ہے، جس کو مدنظر رکھتے ہوئے موٹروے پولیس نے مسافروں کے محفوظ سفر کو یقینی بنانے کے لیے تمام خصوصی اور حفاظتی اقدامات مکمل کر لیے ہیں۔ترجمان نے تمام ڈرائیور ز سے اپیل کی ہے کہ وہ دورانِ سفر حکومت کی جانب سے مقرر کردہ نئی اور کم کی گئی حدِ رفتار پر سختی سے عمل درآمد یقینی بنائیں۔ نئے احکامات کے مطابق، موٹرویز پر کار اور لائٹ ٹرانسپورٹ وہیکل (LTV) کی حدِ رفتار 120 کلومیٹر سے کم کر کے 100 کلومیٹر فی گھنٹہ، جبکہ مسافر بردار (PSV) اور مال بردار گاڑیوں (HTV) کی حد 110 کلومیٹر سے کم کر کے 90 کلومیٹر فی گھنٹہ مقرر کر دی گئی ہے۔

اسی طرح قومی شاہراہوں (ہائی ویز) پر بھی حدِ رفتار میں کمی کی گئی ہے، جہاں اب کار اور ایل ٹی وی (LTV) کے لیے زیادہ سے زیادہ رفتار 80 کلومیٹر فی گھنٹہ ہوگی۔ پبلک ٹرانسپورٹ اور بھاری گاڑیوں کے لیے ہائی ویز پر حدِ رفتار 80 کلومیٹر سے کم کر کے 65 کلومیٹر فی گھنٹہ کر دی گئی ہے۔ ترجمان نے واضح کیا کہ ان اقدامات کا مقصد ٹریفک کے دباؤ کے دوران حادثات سے بچنا اور انسانی جانوں کا تحفظ ہے۔ایڈوائزری میں تاکید کی گئی ہے کہ ڈرائیورزدورانِ ڈرائیونگ اپنی تمام توجہ سڑک پر مرکوز رکھیں، لین اور لائن کے نظم و ضبط کی پابندی کریں اور سیٹ بیلٹ کا استعمال یقینی بنائیں۔ شہریوں کو ہدایت کی گئی ہے کہ وہ غیر ضروری عجلت سے گریز کریں اور کسی بھی قسم کی رہنمائی یا ہنگامی صورتحال میں موٹروے پولیس کی ہیلپ لائن 130، سوشل میڈیا اکاؤنٹس یا ایف ایم 95 سے تازہ ترین معلومات حاصل کرنے کے بعد اپنے سفر کا آغاز کریں۔