وزارت اطلاعات اور اس کے ذیلی ادارے یوم آزادی کی تقریبات کو خصوصی اور تاریخی بنانے کے لیے مربوط کوششیں کریں،وزیر مملکت اطلاعات‘نشریات و قومی ورثہ کی ہدایت

اسلام آباد ۔ 21 جون (اے پی پی)وزیر مملکت برائے اطلاعات‘نشریات و قومی ورثہ مریم اورنگزیب کی زیر صدارت پاکستان کے یوم آزادی کی 70 سالہ تقریبات کے سلسلے میں ہونے والے اجلاس میں فیصلہ ہوا کہ احمد جی چھاگلہ کی تیارکی گئی قومی ترانے کی اصلی دھن کو عالمی معیار کے سازوں کے مطابق نئی جدت دی جائے گی جو پاکستان کی ثقافت کی بھی علم بردار ہو گی۔ اجلاس میں ڈائریکٹر جنرل پی این سی اے جمال شاہ کو اس حوالے سے تفصیلی تجاویز پیش کرنے کی ہدایت کی گئی ہے۔ وزیر مملکت مریم اورنگزیب نے وزارت اطلاعات کو ہدایت کی کہ یوم آزادی کی تقریبات کو شایان شان منانے کے لیے کوئی کسر اٹھا نہ رکھی جائے۔ انہوں نے کہا کہ 14 اگست آزادی کے ساتھ اس نعمت کے لیے ہمارے آباو اجداد کی بے مثال قربانیوں کی بھی یاد دلاتا ہے جو ایک پرچم تلے متحد ہوئے۔ مریم اورنگزیب نے کہا کہ وزارت اطلاعات اور اس کے ذیلی ادارے یوم آزادی کی تقریبات کو خصوصی اور تاریخی بنانے کے لیے مربوط کوششیں کریں۔تقریبات کے دوران ملک کے ہر حصے کے کلچر اور آرٹ کو اجاگر کیا جائے گا ۔انہوں نے کہا کہ چمیپئنز ٹرافی فائنل میں بھارت کے خلاف پاکستان کی تاریخی کامیابی اہم سنگ میل ہے جسے ملک بھر میں بھر پور جوش و خروش سے منایا جارہا ہے ۔انہوں نے پی ٹی وی کو ہدایت کی کہ قوم میں کامیابی اور خوشی کے احساس کو بیدار کرنے کے لئے آزادی تقریبات کے سلسلے میں معیاری اور تخلیقی پرومو تیار کرے ۔