اسلام آباد۔3مئی (اے پی پی):وزارت اطلاعات و نشریات پاکستانی اور بین الاقوامی میڈیا کے لیے آج اور کل لائن آف کنٹرول (ایل او سی) کے دورے میں سہولت فراہم کر رہی ہے۔ اس دورے کا مقصد بھارت کی جانب سے پاکستان میں نام نہاد اور دہشت گردی کے فرضی کیمپوں کے حوالے سے بے بنیاد اور من گھڑت پروپیگنڈے کو بے نقاب کرنا ہے۔
وزارت اطلاعات و نشریات کی طرف سے ہفتہ کو جاری بیان کے مطابق بھارت متعدد بار لائن آف کنٹرول پر مبینہ دہشت گرد ٹھکانوں کے حوالے سے بے بنیاد اور من گھڑت دعوے کرتا رہا ہے۔ اس دورے کے دوران میڈیا کے نمائندوں کو اصل زمینی حقائق دکھانے کے لئے ان مخصوص جگہوں پر لے جایا جائے گا جنہیں بھارت نے جھوٹے دعوئوں میں دہشت گرد کیمپس قرار دیا۔
بیان میں کہا گیا ہے کہ پاکستان امن کے لئے اپنے پختہ عزم کا اعادہ کرتا ہے اور دنیا میں کہیں بھی کسی بھی قسم کی دہشت گردی یا دہشت گردانہ سرگرمیوں کی ہر شکل کو دوٹوک انداز مین مسترد کرتا ہے۔ قوم اپنی خودمختاری کے لئے پرعزم ہے اور بھارت کی کسی بھی جارحیت کا فوری اور منہ توڑ جواب دیا جائے گا۔
Short Link: https://urdu.app.com.pk/urdu/?p=591731
