اسلام آباد۔25اپریل (اے پی پی):وفاقی وزیر مذہبی امور سردار محمد یوسف نے کہا ہے کہ وزیر اعظم شہبازشریف نے خصوصی ہدایت دے رکھی ہے کہ اقلیتوں کا خصوصی خیال رکھا جائے ،وزارت مذہبی امور ہولی ،کرسمس ،ایسٹر کے منانے میں متحرک کردار ادا کرتی ہے ، پاکستان میں رہنے والے سب سے پہلے پاکستانی ہیں ، پاکستان مختلف مذاہب و ثقافتوں کا خوبصورت گلدستہ ہے ۔
جمعہ کو یہاں ایسٹر کی تقریب سے خطاب کرتے ہوئے انہوں نے کہا کہ تمام مذہب کا مقصد امن کا قیام ہے ،بعض لوگ مذہب سے دوری کی وجہ سے دوسرے مذاہب کے خلاف کوئی اقدام کردیتے ہیں ،دہشتگردی کرنے والوں کا کوئی مذہب نہیں ہے۔ اسلام ایک شخص کے قتل کو ساری انسانیت کا قتل قرار دیتا ہے ۔
اقلیتوں کو ایسٹر پر پیغام دینا چاہتا ہوں کہ بہت جلد نیشنل اقلیتی کمیشن بنانے جارہے ہیں ، بھارت کی طرف سے جو دھمکی پاکستان کو دی گئی ہے اس کا ردعمل دیں گے۔
سندھ طاس معاہدے کی ضمانت عالمی بینک نے دی ہے ،بھارت کی بھول ہے کہ وہ ایٹمی طاقت ہے ،ہم بھی ایٹمی طاقت ہیں ۔ انہوں نے کہا کہ سیاسی و عسکری قیادت ایک پیج پر ہے، اگر بھارت نے پاکستان کی طرف میلی آنکھ سے دیکھا تو اسے کرارا جواب ملے گا۔
Short Link: https://urdu.app.com.pk/urdu/?p=588101
