اسلام آباد۔7جون (اے پی پی):وفاقی وزیر اطلاعات و نشریات مریم اورنگزیب نے کہا ہے کہ وزیراعظم شہباز شریف آج بزنس کانفرنس میں پاکستان کی معاشی ترقی اور خوشحالی کے لئے اپنا وژن کاروباری برادری کے سامنے پیش کریں گے۔
منگل کو اپنے ایک بیان میں انہوں نے کہا کہ وزیراعظم شہباز شریف آج بزنس کانفرنس سے خطاب کریں گے۔ بزنس کانفرنس میں ملک بھر سے کاروباری برادری شرکت کر رہی ہے۔ وزیراعظم کاروباری برادری سے بجٹ پر اہم مشاورت بھی کریں گے۔
انہوں نے کہا کہ زراعت، فوڈ سکیورٹی، توانائی، آئی ٹی، ٹیکسٹائل، مینوفیکچرنگ، برآمدات اور دیگر شعبوں سے تعلق رکھنے والے کاروباری حضرات کانفرنس میں شرکت کر رہے ہیں۔ انہوں نے کہا کہ وزیراعظم کانفرنس میں میثاق معیشت کے لئے نیشنل ڈائیلاگ کا آغاز کریں گے۔ وزیراعظم کاروباری شخصیات سے تجاویز لیں گے اوراپنی حکومت کے مستقبل کے لائحہ عمل پر اعتماد میں لیں گے۔
انہوں نے کہا کہ وزیراعظم کانفرنس میں ملک کو درپیش معاشی مسائل کے حل کے لئے فوری، وسط اور طویل المدتی اقدامات پر تبادلہ خیال کریں گے۔
اس کے علاوہ وزیراعظم مالی سال 23 ۔ 2022 کے لئے بجٹ تجاویز بھی حاصل کریں گے۔ انہوں نے کہا کہ وزیراعظم شہبازشریف کا وژن ایک ایسا پاکستان بنانا ہے جہاں معیشت پھلے پھولے،
مستحکم اور پائیدار بنیادوں پرترقی ہو، ہرپاکستانی اور ملک کا ہر خطہ اس میں حصہ دار ہو، جہاں غربت اورمحرومیوں کا خاتمہ ہو۔ وفاقی وزیر اطلاعات نے کہا کہ وزیراعظم ایسا پاکستان بنانا چاہتے ہیں جہاں شہریوں کو سماجی، سیاسی اور معاشی حقوق میسر آئیں، زندگی کی تلخیوں سے نجات ملے اور انہیں ایک بہتر زندگی میسر آئے
