اسلام آباد ۔ 19 فروری (اے پی پی) وزیراعظم عمران خان نے فیڈرل بورڈ آف ریونیو (ایف بی آر) کو ٹیکس دہندگان کے لئے آسانی و سہولت کاری کو یقینی بنانے جبکہ ٹیکس نادہندگان اور ٹیکس چوروں کو عوام کے سامنے بے نقاب کرنے کی ہدایت کرتے ہوئے کہا ہے کہ باقاعدگی سے ٹیکسز ادا کرنے والوں کو ہراساں کرنے کی بجائے ٹیکس چوروں اور نادہندگان پر توجہ مرکوز کی جائے، ٹیکس چور قوم ملک اور قوم کے دشمن ہیں، ان کے خلاف کسی قسم کی کوئی رعایت نہیں برتی جائے گی۔ انہوں نے یہ بات منگل کو ملک میں محصولات اکٹھا کرنے کے سلسلے میں کئے جانے والے حکومتی اقدامات کے حوالے سے اہم اجلاس کی صدارت کرتے ہوئے کہی۔ اجلاس میں وزیرِ خزانہ اسد عمر، وزیرِ اطلاعات چوہدری فواد حسین، وزیرِ مملکت برائے ریونیو حماد اظہر، ترجمان ندیم افضل چن، معاون خصوصی افتخار درانی، چیئرمین ایف بی آر جہانزیب خان و دیگر افسران شریک تھے۔ اجلاس کے دوران چئیرمین ایف بی آر نے ٹیکس اکٹھا کرنے، ٹیکس بنیاد میں اضافے اور نادہندگان سے ٹیکس وصولی کے لئے کئے جانے والے نئے اقدامات سے وزیرِ اعظم کو آگاہ کیا۔ وزیراعظم نے ہدایت کی کہ قابلِ وصول ٹیکسز کواکٹھا کرنے کے لئے جدید طریقہ کار برؤے کار لائے جائیں تاکہ جہاں نا دہندگان کو ٹیکس نیٹ میں لایا جاسکے وہاں ٹیکس دہندگان کے لئے آسانیاں پیدا کی جا سکیں۔ انہوں نے کہا کہ ٹیکس چوروں کے خلاف بلا تفریق کارروائی کے ساتھ ساتھ ٹیکس چوری میں سہولت فراہم کرنے والے محکمے کے بدعنوان عناصر کے خلاف کاروائی کو بھی یقینی بنایا جائے۔ اجلاس کے دوران وزیراعظم کو بتایا گیا کہ ہائی نیٹ ورتھ افراد کے چھ ہزار سے زائد کیسز زیرِ غور ہیں جن سے کل دو ارب سے زائد کی آمدن متوقع ہے، اب تک ان میں 1.3 ارب کی وصولی کی جاچکی ہے۔ وزیراعظم کو آگاہ کیا گیا کہ معلومات اور تحقیقات کے 66 کیسزپر کام جاری ہے جن میں سے اب تک 1.5 ارب روپے سے زائد کی وصولی کی جاچکی ہے۔ بیرون ملک جائیدادوں (آف شور اثاثہ جات) کے کیسز میں اب تک 6 ارب سے زائد کے واجب الادا ٹیکسز اکٹھے کئے جاچکے ہیں۔ اجلاس کو بتایا گیا کہ سیکشن 214 ای کے تحت 1.573 ارب روپے کی وصولیاں کی جاچکی ہیں۔ وزیراعظم کو بریفنگ دی گئی کہ ایف بی آر کی جانب سے اب تک 2000 پلازہ کی میپنگ کی جاچکی ہے جبکہ 2500 سے زائد پوائنٹ آف سیل پر قابلِ وصول ٹیکس اکٹھا کرنے کے لئے خودکار نظام کی تنصیب کی جا چکی ہے۔ ایف بی آر کی جانب سے ان نئے اقدامات کے تحت 24.818 ارب روپے کی وصولی متوقع ہے جبکہ اس میں سے اب تک 11.882 ارب روپے وصول کئے جاچکے ہیں۔
