اسلام آباد۔11جولائی (اے پی پی):وزیراعظم محمد شہبازشریف نےکہا ہے کہ قومی سلامتی ،خودمختاری کے تحفظ ،مجرمانہ سرگرمیوں کے تدارک اور انسداد دہشت گردی کیلئے آئی بی کا کردار انتہائی اہمیت کا حامل ہے ، مادر وطن کیلئے جانیں قربان کرنے والے شہداءپر قوم کو فخر ہے۔
وزیراعظم آفس کے میڈیا ونگ سے جاری بیان کے مطابق ان خیالات کا اظہار انہوں نے انٹیلی جنس بیورو کے ڈائریکٹر جنرل فواد اسد اللہ خان سے گفتگو کرتے ہوئے کیا جنہوں نے وزیراعظم کو انٹیلی جنس بیورو کی ایک سال کی کارکردگی کی رپورٹ پیش کی۔
وزیراعظم نے آئی بی کی ایک سال کی کارکردگی پر اطمینان کا اظہار کیا ۔ وزیرعظم نے کہا کہ پاکستان کی سلامتی، خودمختاری، ملکی اور غیرملکی عناصر سے خطرات کے مقابلے میں آئی بی کا کردار قابل تحسین ہے ، قومی سلامتی اور خودمختاری کے تحفظ میں آئی بی نے اہم کردار ادا کیا ہے ۔ انہوں نے کہا کہ وزیراعظم بننے کے بعد آئی بی کوقومی مفادات کے حوالے سے اضافی ٹاسک سونپے جو اس نے کامیابی سے حاصل کئے۔ وزیراعظم نے کہا کہ ملک کے اندر مجرمانہ سرگرمیوں کے تدارک، انسداد دہشت گردی میں آئی بی نے فعال کردار ادا کیا، بروقت اطلاعات کی فراہمی سے درست فیصلہ سازی میں بھی آئی بی کا شاندار کردار رہا۔
وزیراعظم نے فواد اسداللہ کی پیشہ وارانہ قابلیت اور ادارے کو بہتر بنانے کی کاوشوں کی سراہا ۔ وزیراعظم نے آئی بی کے افسران اور عملے کو شاباش دی اور آئی بی کے شہداءکو خراج عقیدت پیش کیا۔ وزیراعظم نے کہا کہ ادارے کی غیرمعمولی کامیابیاں قابل فخر ہیں، مادر وطن کے تحفظ اور سلامتی کے لئے جام شہادت نوش کرنے والے شہداءپر قوم کو فخر ہے۔ فواد اسداللہ خان نے وزیراعظم کے آئی بی پر اعتماد اور بھرپور حمایت پر شکریہ ادا کیا ، آئی بی ملک کی سب سے پرانی اور بڑی سویلین انٹیلی جنس ایجنسی ہے۔
