دوحہ۔24اگست (اے پی پی):وزیراعظم محمد شہباز شریف نے کہا ہے کہ ہمیں فخر ہے کہ فیفا ورلڈ کپ قطر 2022 کا آفیشل میچ بال "الریحلہ”پاکستان میں بنایا گیا ہے۔ ان خیالات کا اظہار انہو ں نے بدھ کو فیفا ورلڈ کپ سٹیڈیم 974 کے دورہ کے موقع پر کیا۔ اس موقع پر وزیراعظم کو ورلڈکپ کی تیاریوں سے متعلق بریفنگ دی گئی۔
سٹیڈیم پہنچنے پر وزیراعظم کو سٹیڈیم کا گائیڈڈ دورہ کرایا گیا اور انہیں فیفا ورلڈ کپ 2022 کی میزبانی کے لئے قطر کی حکومت کی جانب سے کی گئی وسیع تیاریوں کے بارے میں بتایا گیا۔ وزیراعظم نے دنیا کے سب سے بڑے کھیلوں کے ایونٹ کے لئے جدید ترین سہولیات کے قیام میں قطر کی کوششوں کو سراہا۔
انہوں نے فٹ بال سٹیڈیم کی شان و شوکت اور اس سے منسلک سہولیات کی تعریف کی جس میں قطری ثقافت اور شناخت کی عکاسی کی گئی ہے ۔ وزیراعظم نے قطر کے عوام اور قیادت کو میگا ایونٹ کے انعقاد میں شاندار کامیابی کی خواہش کا اظہار کیا ۔
وزیراعظم نے ورلڈ کپ سے متعلق بنیادی ڈھانچے کی تعمیر میں پاکستانی افرادی قوت کے اہم کردار کو سراہا۔ وزیراعظم نے کہا کہ پاکستانیوں کو اس حقیقت پر فخر ہے کہ فٹ بال "الریحلہ” فیفا ورلڈ کپ قطر 2022 کا آفیشل میچ بال پاکستان میں بنایا گیا ہے۔
Short Link: https://urdu.app.com.pk/urdu/?p=323609
