اسلام آباد۔24مارچ (اے پی پی):وزیراعظم کے معاون خصوصی برائے صنعت و پیداوار ہارون اختر خان سے اینگرو کارپوریشن کے چیئرمین حسین دائود نے ملاقات کی ہے۔ اس ملاقات میں کاروباری برادری کا اعتماد بحال کرنے اور پاکستان میں کاروبار کو آسان بنانے کے حوالے سے تبادلہ خیال کیا گیا۔ وزارت صنعت و پیداوار سے جاری اعلامیہ کے مطابق ہارون اختر خان نے اس بات پر زور دیا کہ بڑے پیمانے پر صنعتی پیداوار کے مسائل کے حل کے لیے نجی شعبے کے ساتھ اشتراک ضروری ہے۔
انہوں نے حکومت کی جانب سے سرمایہ کاری کو فروغ دینے اور صنعتی ترقی کے لیے سازگار ماحول پیدا کرنے کی مسلسل کوششوں کو اجاگر کرتے ہوئے کہاکہ حکومت سرمایہ کاری کو فروغ دینے اور مستحکم اقتصادی ترقی کو یقینی بنانے کے لیے تمام ممکنہ اقدامات کر رہی ہے۔انہوں نے خاص طور پر اس بات پر زور دیا کہ خصوصی سرمایہ کاری سہولت کونسل (ایس آئی ایف سی) ملکی اور غیر ملکی سرمایہ کاری کو پاکستان میں لانے میں اہم کردار ادا کر رہی ہے۔
ملاقات میں بڑے پیمانے پر ادارہ جاتی سرمایہ کاری اور نجی شعبے کی فعال شرکت پر زور دیا گیا تاکہ اقتصادی ترقی کو تیز کیا جا سکے۔ ہارون اختر خان نے مزید کہا کہ ایک ون ونڈو سہولت مرکز قائم کیا جا رہا ہے جس کا مقصد کاروباری طریقہ کار کو آسان بنانا اور پاکستان میں کاروبار کرنے کی سہولت کو بہتر بنانا ہے۔حسین دائود نے حکومت کی کاروبار دوست اقدامات پر اعتماد کا اظہار کرتے ہوئے کہا کہ ان اقدامات سے کاروباری ماحول میں بہتری آئے گی۔ ملاقات کے اختتام پر ہارون اختر خان نے کہا کہ صنعتی ترقی کے لیے عوامی و نجی شراکت داری وقت کی اہم ضرورت ہے۔
