اسلام آباد۔19اکتوبر (اے پی پی):وزیراعظم کے معاون خصوصی جواد سہراب ملک نے بیرون ملک مقیم پاکستانی کارکنوں کے واجبات کی وصولی کے لیے او پی ایف ویب پورٹل کا آغاز کر دیا تاکہ پاکستانی تارکین وطن کو سہولت فراہم کی جا سکے، یہ سروس تنخواہ، مو ت اور معذوری کے معاوضے اور کارکنوں کے دیگر الائونس جیسے واجبات کی ادائیگی کو تیز کرنے میں مدد فراہم کرے گی۔
وزارت سمندر پار پاکستانی اورانسانی وسائل کی ترقی کی طرف سے جمعرات کو جاری بیان کے مطابق انہوں نے اوورسیز پاکستان فائونڈیشن (او پی ایف) ہیڈ کوارٹرز میں واجبات کے انتظام کے لیے ویب پر مبنی ایپلی کیشن کا باضابطہ اجرا کیا اوربیرون ملک مقیم پاکستانیوں کو سروسز کی فراہمی کو بہتر بنانے کے لیے ٹیکنالوجی کے زیادہ سے زیادہ استعمال پر زور دیا۔ انہوں نے کہا کہ انٹرنیٹ سروس ڈیلیوری نے انقلاب برپا کر دیا ہے کیونکہ اس نے دنیا بھر میں کاروبار کے طریقہ کار کو تبدیل کر دیا ہے۔ مزید برآں یہ نئی ٹیکنالوجی ترقی کا باعث بھی بنی ہے، اس طرح، جدید ترین ٹیکنالوجی کا استعمال کرتے ہوئے کاروباری عمل کو بہتر طریقے سے منظم کرنے کا موقع فراہم کیا ہے۔ ویب پر مبنی نظام کے نفاذ سے او پی ایف حکام کی اوورسیز پاکستانیوں کے بقایا جات کے کیسز نمٹانے کی رفتار میں نمایاں اضافہ ہوا ہے۔
اب، تمام درخواستیں اپنے اصل مقام، جو بیرون ملک پاکستانی مشنز میں کنٹری ویلفیئر اتاشیوں کے دفاتر ہیں، پر براہ راست سسٹم میں داخل ہوتی ہیں۔ یہ دستی ڈیٹا انٹری کے لیے او پی ایف کو ہارڈ کاپی ایپلی کیشنز بھیجنے کی سابقہ ضرورت کو ختم کر دیتا ہے، جس میں تقریبا 30 دن لگتے تھے۔ نئے نظام کے ساتھ، درخواستوں کی اس بوجھل منتقلی کے وقت کو کم کرکے صرف چند منٹ تک لایا گیا ہے۔ مزید برآں، پورے ایپلی کیشن ورک فلو کو آٹومیشن کے ذریعے آسان بنایا گیا ہے۔ نیا نظام ایپلی کیشنز تک حقیقی وقت تک رسائی فراہم کرتا ہے، جس سے مختلف محکموں میں بغیر کسی رکاوٹ کے نقل و حرکت کی اجازت ملتی ہے۔ ویب پر مبنی آن لائن سسٹم تمام سٹیک ہولڈرز کو زیر التوا واجبات کے کیسز، ورکرز کی تفصیلات، ادائیگی کی تقسیم کی صورتحال، دستاویزات کی تصدیق وغیرہ کے بارے میں تازہ ترین معلومات تک رسائی کی اجازت دیتا ہے۔
مزید برآں، یہ سینئر مینجمنٹ کو آن لائن ایپلی کیشنز کو ٹریک کرنے اور آنے والی ایپلی کیشنز کی پیشرفت کی نگرانی کرنے کا اختیار دیتا ہے۔معاون خصوصی نے کہا کہ وزیر اعظم پاکستان کے ویژن کے مطابق وزارت سمندر پار پاکستانیز اور انسانی وسائل کی ترقی ان سمندر پار پاکستانیوں کو زیادہ سے زیادہ سہولیات اور امداد فراہم کرنے کے لیے کوشاں ہے جن کا اپنے وطن سے مضبوط رشتہ ہے ان کی سہولت کے لیے تمام راستے تلاش کرنے کے لیے موجودہ حکومت اس پر عمل پیرا ہے۔
ویب پر مبنی سافٹ ویئر ایپلی کیشنز کی اہمیت کو اجاگر کرتے ہوئے، وزیراعظم کے معاون خصوصی برائے سمندر پار پاکستانی نے کہاکہ آج کے انٹرنیٹ پر چلنے والے معاشرے میں، ویب پر مبنی ایپلی کیشنز 24 گھنٹے کی بنیاد پر خدمات تک فوری رسائی فراہم کرتی ہیں۔ انہوں نے اوورسیز پاکستانیوں کے خاندانوں کو واجبات کی ادائیگی میں تیزی لانے کے لیے ویب پر مبنی ایپلی کیشن تیار کرنے پر او پی ایف کی انتظامیہ کی تعریف کی۔ ایجوکیشن پورٹل کے لانچ سے پہلے، او پی ایف کی جانب سے اوورسیز پاکستانیوں کو سروس کی فراہمی کے فروغ کے لیے ویب پر مبنی ایپلی کیشن کی افادیت کے بارے جامع پریزنٹیشن دی گئی۔
