لاہور۔28اگست (اے پی پی):وزیراعلیٰ پنجاب مریم نواز نے دریائے راوی پرشاہدرہ کے مقام کا دورہ کیا اورریسکیو عملے کے ہمراہ کشتی میں سوار ہو کر دریائے راوی کا معائنہ کیا ، فلڈ ریلیف کیمپ وانتظامات کا جائزہ لیااور راوی میں شاہدرہ کے مقام پر بڑا سیلابی ریلا گزر نے پر صورت حال کا مشاہدہ کیا۔ اس موقع پر مریم نواز نے شاہدرہ راوی پل پر گفتگو کرتے ہوئے کہا کہ اپنے انفراسٹرکچر اور ڈیمز کو مستقبل میں بہتر بنائیں گے، پانی سٹور کرنے کے لیے سٹرکچر بنائیں گے اورسیلاب سے نمٹنے کے لیے ابھی سے منصوبہ بندی کریں گے۔ وزیراعلی نے کہا کہ پنجاب میں تجاوزات کے خلاف مہم جاری ہے،دریائو ں اور ندی نالوں کی آبی گزرگاہ کو بھی کلیئر کیا جائیگا، متاثرین کی مدد پر پولیس اور ریسکیو کا شکریہ ادا کرتے ہیں، افواج پاکستان نے بھی مدد کی اور لوگوں کو ریسکیو کیا ہے، ان کا شکریہ ادا کرتی ہوں،ریسکیو اور ریلیف ورک میں عوام تعاون کریں۔ وزیراعلیٰ مریم نواز نے کہا کہ کسی ایک پارٹی کا نام نہیں لینا چاہتی لیکن ہمیں سیاست سے بالاتر ہو کر ملکی مفاد میں اب کچھ فیصلے کر لینے چاہئیں کیونکہ یہ لوگوں کی زندگیوں کا سوال ہے۔ انہوں نے کہا کہ پنجاب میں شدید ترین بارشوں و بھارت کی جانب سے پانی چھوڑنے کے بعد سیلابی صورتحال کا سامنا اور یہ ایک غیر معمولی صورتحال ہے ، بھارت نے اپنے ڈیم بھر جانے کی وجہ سے پانی چھوڑا، تمام ادارے مکمل الرٹ تھے ۔
وزیراعلی مریم نواز نے کہا کہ انتظامیہ ،ریسکیو، ہیلتھ ڈیپارٹمنٹ ،کمشنرز اور ڈپٹی کمشنر نے دن رات کام کیا ہے ، اگر تیاری نہ ہوتی تو نقصان بہت زیادہ ہوتا ،38 سال بعد ایسا سیلاب آیا ہے ، ہمارے لیے ہر جان قیمتی ہے ۔وزیراعلیٰ مریم نواز نے کہا کہ بروقت لوگوں کو محفوظ مقامات پر منتقل کیا گیا ، یہ سیلاب کوئی معمولی سیلاب نہیں ہے ، لوگوں کے مال مویشیوں کو بھی منتقل کیا ، اللہ نے بڑے نقصان سے بچایا ہے ، جو بھی نقصان ہوا ،مجھے اس پر افسوس ہے۔ وزیراعلیٰ نے کہا کہ اپنے بچوں کی حفاظت کریں، جو بھی نقصان ہوا ہے اسے پنجاب حکومت پورا کرے گی ، ہم متاثرین تک پہنچیں گے ، مشکل ترین حالات میں سب نے بہت اچھا کام کیا، بروقت ندیوں نالوں کی صفائی کی گئی ، پنجاب میں تین مہینے سے بارشیں جاری ہیں لیکن پیشگی انتظامات کے باعث ہی کم نقصان ہوا ۔ مریم نواز نے کہا کہ وزیراعظم شہباز شریف،وزیراعلیٰ پنجاب اور پوری مسلم لیگ (ن) سیلاب متاثرین کے ساتھ کھڑی ہے، کبھی اتنا پانی راوی میں نہیں دیکھا ، ہمیں اپنے انفراسٹرکچر کو بہتر کرنا ہو گا ، پی ڈی ایم اے، این ڈی ایم اے اور دیگر ٹیموں کو بٹھایا اور اگلے سالوں کے لئے پلان طلب کیا ہے۔وزیراعلی مریم نواز نے سیلاب کی صورتحال کے پیش نظر عوام سے تعاون کی بھی اپیل کی ۔
