لاہور۔7جولائی (اے پی پی):وزیراعلیٰ پنجاب مریم نواز نے محرم الحرام کے دوران مثالی امن و امان اور بے مثال خدمت پر اظہارِ تشکر کرتے ہوئے اسٹیک ہولڈرز کو خراجِ تحسین پیش کیا۔ وزیراعلیٰ نے کہا کہ محرم الحرام میں عزاداروں کی خدمت،امن،اتحاد اور احترامِ پر صوبائی وزرا، علما کرام، پاک فوج اور رینجرز کاخصوصی شکریہ ادا کرتے ہوئے پولیس،ضلعی انتظامیہ اور تمام اداروں کو شاباش بھی دی ہے۔
وزیراعلیٰ نے کہا کہ صوبائی وزرا، پولیس، علما اور انتظامیہ سمیت تمام ادارے لائق تحسین ہیں۔پنجاب میں محرم الحرام کے دوران جو خدمت اور امن نظر آیا ایسا پہلے کبھی نہیں دیکھا گیا۔ پہلی بار پنجاب کے وزرا دس دن عزاداروں کی خدمت میں فیلڈ میں موجود رہے،تمام امور کی باریک بینی سے نگرانی کی گئی۔ انہوں نے کہا کہ محرم الحرام میں امن و احترام کا جو منظر پنجاب میں قائم ہوا، وہ سب کی مشترکہ محنت کا نتیجہ ہے۔ محرم الحرام کے عشرہ میں بے مثال خدمت اور امن ہماری تاریخ کا روشن باب ہے۔
پنجاب کی دھرتی امن، اتحاد اور بھائی چارے کی دھرتی ہے۔ محرم الحرام کے دوران عزاداروں کے لئے لنگر، مشروبات اور منرل واٹر کا اہتمام کرنے پر انتظامیہ کو شاباش دیتی ہوں۔ محرم الحرام میں گرمی اور حبس کے پیش نظر پانی کے چھڑکاو کا اہتمام کرنا بھی قابل تحسین ہے۔
