فیصل آباد۔ 28 اگست (اے پی پی):وزیراعلیٰ پنجاب مریم نواز شریف کی ہدایات پر چنیوٹ میں دریائے چناب کے کنارے حفاظتی اقدامات مزید سخت کر دیئے گئے ہیں۔صوبائی وزیر صحت ، پاپولیشن و انچارج فلڈ کنٹرول فیصل آباد ڈویژن خواجہ عمران نذیر اورصوبائی وزیر صحت و چیئرمین کابینہ کمیٹی برائے ڈیزاسٹر مینجمنٹ خواجہ سلمان رفیق نے چنیوٹ کا دورہ کیا۔اس موقع پر کمشنر مریم خان،ڈپٹی کمشنر صفی اللہ گوندل اور ڈسٹرکٹ پولیس آفیسر عبداللہ احمد بھی ہمراہ تھے۔ وفد نے ٹی ڈی سی پی، قاضیاں، چنیوٹ بند اور دیگر مقامات پر دریائی پٹی اور حفاظتی بندوں کا معائنہ کیا۔صوبائی وزراء نے دریائی علاقوں سے شہریوں کے تیز رفتار انخلاء پر ضلعی انتظامیہ کی کارکردگی کو سراہا اور موقع پر موجود افراد سے ملاقات کرتے ہوئے انہیں سیلابی خطرات سے آگاہ کیا۔ انہوں نے کہا کہ شہریوں کے جان و مال کا تحفظ حکومت کی اولین ترجیح ہے۔ڈی سی آفس میں میڈیا کو بریفنگ دیتے ہوئے بتایا گیا کہ ضلع چنیوٹ کے87 دیہات سیلابی ریلے سے متاثر ہوئے ہیں جبکہ33 ہزار کے قریب افراد کو محفوظ مقامات پر منتقل کر دیا گیا ہے۔متاثرہ آبادی کے لئے12 فلڈ ریلیف کیمپس مکمل طور پر فعال ہیں اور موجودہ سیلابی ریلا تاریخ کا سب سے بڑا سیلاب ہے۔
وزیراعلیٰ پنجاب مریم نواز شریف کی ہدایات پر صوبائی کابینہ کے تمام اراکین فیلڈ میں موجود ہیں اور متاثرین کی امداد کے لئے وزیراعلیٰ جلد خصوصی اعلان بھی کریں گی۔صوبائی وزراء نے کہا کہ میڈیا نمائندگان کی مثبت رپورٹنگ لائق تحسین ہے جبکہ ریسکیو1122 کا عملہ جانفشانی سے خدمات انجام دے رہا ہے۔ مشترکہ کاوشوں سے سیلابی صورتحال پر قابو پایا جائے گا۔ دریں اثناء ضلع چنیوٹ کے دریائے چناب میں اونچے درجے کا سیلاب،ڈویژنل وضلعی اور پولیس انتظامیہ شہریوں کے جان ومال کے تحفظ کے لئے مسلسل سرگرم۔دو دن میں کمشنر مریم خان کا آرپی او ذیشان اصغرکے ہمراہ چنیوٹ کا تیسرا دورہ۔ڈپٹی کمشنر صفی اللہ گوندل اور ڈی پی او عبداللہ احمد نے حفاظتی بندوں کا دورہ کرایا۔وہ قاضیاں ہرل،ٹی ڈی سی پی سمیت دیگر حفاظتی بندوں پر گئے اور جامع انسپکشن کی۔کمشنر اور آرپی او نے گورنمنٹ اسلامیہ کالج تحصیل چوک میں قائم فلڈ ریلیف کیمپ کا بھی دورہ کیا اورکیمپ میں پناہ لینے والوں کے لئے دستیاب سہولیات کا جائزہ لیا۔انہوں نے کہا کہ شہریوں کی سہولیات میں کوئی کسر اٹھا نہ رکھی جائے۔
