کراچی۔ 28 اگست (اے پی پی):وزیراعلی سندھ سید مراد علی شاہ نے جمعرات کے روز وزیراعلی ہائوس میں ہونے والی ملاقات میں کراچی میں نئے تعینات ہونے والے امریکی قونصل جنرل چارلس گڈمین کا خیرمقدم کیا۔جاری اعلامیہ کے مطابق وزیراعلی سندھ نے چارلس گڈمن کو سندھ میں ذمہ داریاں سنبھالنے پر مبارکباد دی اور انہیں صوبائی حکومت کی جانب سے مکمل تعاون اور حمایت کی یقین دہانی کرائی۔ سید مراد علی شاہ نے کہا کہ سندھ ثقافتی اعتبار سے ایک عظیم صوبہ ہے جو 5ہزار سال پرانی موئن جو دڑو کی تہذیب کا وارث ہے۔ انہوں نے کہا کہ سندھ کے عوام مذہب اور ذات پات کے فرق سے بالاتر ہو کر محبت اور بھائی چارے کے ساتھ رہتے ہیں۔قونصل جنرل چارلس گڈمن نے وزیراعلی کے گرم جوش استقبال پر شکریہ ادا کرتے ہوئے کہا کہ وہ سندھ کے ثقافتی ورثے کو قریب سے دیکھنے کے منتظر ہیں۔
انہوں کہاکہ کراچی ایک خوبصورت شہر ہے اور وہ صوبے کے تاریخی اور ثقافتی مقامات کا دورہ کریں گے۔ انہوں نے یہ بھی کہا کہ انہیں کھانے پکانے کا شوق ہے اور کراچی کے ذائقہ دار کھانوں کی شہرت کے باعث وہ شہر کی لذتوں کو چکھنے کے لیے بے تاب ہیں۔ ملاقات میں کراچی کی موجودہ صورتحال، حالیہ شدید بارشوں اور ان کے اثرات پر بھی تبادلہ خیال کیا گیا۔ قونصل جنرل نے مون سون بارشوں کے باعث جانی نقصان پر افسوس کا اظہار کیا۔ اجلاس میں پنجاب میں آنے والے سیلاب اور اس کے سندھ پر ممکنہ اثرات پر بھی بات ہوئی۔وزیراعلی سندھ نے قونصل جنرل کو یقین دلایا کہ سندھ میں ان کا قیام خوشگوار اور نتیجہ خیز ثابت ہوگا۔
